Joseph Marello Youth Summer Camp 2016 sa SFDA Gipahigayon

Mga partisipante gikan sa GKK San Francisco de Asis Parish

Ang Parokya sa San Francisco de Asis nagpahigayon sa ilang tinuig nga Joseph Marello Youth Summer Camp niadtong Mayo 19-21, 2016 nga may temang “Hearts Formation, Hearts for Mission”. Ang maong panagtigum gilangkuban sa mga kabataan gikan sa 28 ka mga GKK nga gibahin sa 5 ka zona. Giduyugan usab kini sa nasyonal nga opisyales sa Joseph Marello Youth – ang Joseph Marello Youth Council for Philippine Province.

Ang maong panagtigum gisugdan sa Santos nga misa nga pinanguluhan nila ni Rev. Fr. Edmar Olaivar, OSJ ug Rev. Fr. Ferdimagne Pascua, OSJ, inubanan ni Rev. Fr. Ariel Celeste, OSJ, kura paroko. Gisundan kini sa usa ka parada nga gilangkuban sa Tagakpan Elementary School Drum and Bugle Corps ug mga partisipante gikan sa nagkadaiyang zona ug programa agi’g pormal nga pag-abri sa nasugyot nga panagtigum. Katuyuan niini ang mga musunod: “Giving Him to our fellowmen in the Josephite-Marellian way, integrate them to the community, nurture the gift of faith through catechism, guide them as they accept their mission, and celebrate as they have Christ in their lives”.

Adunay gipahigayon nga pagpangampanya alang sa bokasyon nga pagkarelihiyoso nga gipasiugdahan sa nagkadaiyang kongregasyon gikan sa pundok sa Alexian Brothers, Brothers of the Sacred Heart, Society of Divine Vocations, Dominican Sisters of the Trinity, Sorelle Missionarie dell’ Amore di Cristo (SMAC Sisters), Teresian Daughters of Mary, Ursuline Sisters, Daughters of St. Paul, Missionaries of Our Lady of Perpetual Help ug Apostles of Jesus Crucified Sisters. Aduna usab pakigpulong kabahin sa “Youth Spirituality” ni Mr. Dennis Asumbrado kung diin iyang gibutyag ang dakong bahin sa mga batan-on nga nalambigit sa imoralidad. Matud pa niya nga angay himuong sumbanan ang kaputli ni Maria ug ang pagkamatarong ni Jose nga mga ginikanan ni Hesus. Gipahigayon usab ang “Living Rosary” nga gisundan sa “Taize Prayer”, pagsimba sa krus ug counselling.

Ang ikaduhang adlaw gilangkuban sa mga buluhaton sama sa Fun Run ug mga pakigpulong ni Bro. Wilfredo Arcenal, OSJ mahitungod sa “Joseph Marello Youth History and Identity” ug sa kinabuhi ni St. Joseph Marello, ang gihimong panig-ingnan sa mga kabatan-onan; ug ikaduha, ni Rev. Fr. Ferdimagne Pascua, OSJ mahitungod sa “JMY: Oblation (Service and Commitment. Gipahigayon usab ang panagtigi sa nagkadaiyang mga Zona sa sayaw (folk dance), awit, ug ang Search for Mr. and Ms. JMY Idol 2016.

Si Abigail Cervas, usa sa mga partisipante, sa dihang gipangutana mahitungod sa naasoy nga aktibidad, nagpadayag ug dakong kalipay. Matud niya, daghan siya’g nakat-unan bahin sa pagpalambo sa ispiritwal nga aspeto sa pagpangalagad sa katilingban ug pagpalawom sa pagtuo diha kang Kristo. Si Cristina Baguio, usa usab sa mga partisipante, nagpadayag nga malipayon siya sa kalampusan sa maong aktibidad. Si Ryan Café, JMY President sa dihang gihinabi mahitungod sa iyang gibati sa pag-organisa niining na-asoy nga youth camp, nagbutyag: ‘’Organizing youth camp has always been a great feeling of joy for me. Reflecting on this year’s theme “Hearts Formation, Hearts for Mission”, we, as organizers, were so afraid that we might not attain our objective of becoming an instrument for the youth to have a heart for mission and service, but looking on the response of participants, we believe we made a difference and somehow touched the hearts of these young ones.”

Ang ikatulong adlaw gigahin alang sa Group Dynamics kung diin gihatagan ug gimbug-aton ang pakighiusa ug pakiglambigit nga sarang mamahimong pundasyon sa mga batan-on sa ilang inadlaw-adlaw nga gimbuhaton. Malampusong nahuman ang nasugyot nga “youth camp” sa santos nga misa nga gisundan sa paghatag ug mga pasidungog ug pahalipay sa mga mananaog sa nagkadaiyang mga aktibidades. Mahinangpunon nga gidawat sa Zone 2 ang pasidungog nga mananaog sa sayaw (folk dance), Zone 4 sa kanta, pambato gikan sa Zone 1 – Mr. Joseph Marello Youth, ug Zone 4 – Ms. Joseph Marello Youth. Nahimo usab nga mananaog ang GKK San Roque Crossing (Zone 1) sa panag-tigiay sa luto nga gipahigayon sa katapusang adlaw sa na-asoy nga panagtigum. (Rizzel Mae C. Daya | San Francisco de Asis Parish)

Save