Si Hesus Alang Kanako

June 19, 2016
Zec 12:10-11; 13:1/ Gal 3:26-29/ Lk 9:18-24

“Kinsa man ako sumala sa mga tawo?” Mao kini ang unang pangutana ni Hesus ngadto sa iyang mga tinun-an diha sa atong Ebanghelyo niining ika-12 nga Domingo sa Ordinaryong Panahon. Ug dali lamang kining natubag sa mga tinun-an. Adunay nag-ingun nga Siya mao si Juan nga Magbubunyag nga nabanhaw gikan sa mga patay. Adunay nag ingun nga siya mao si Elias, o kaha usa mga propeta. Mao kini ang panglantaw sa mga tawo kang Hesus.

Apan ang pangutana nga lisud tubagon ug angay natong pamalandungan mao ang ikaduhang pangutana ni Hesus, “Apan kamo, kinsa man ako alang kaninyo?” Daw sa atong mahanduraw ang mga nawong sa mga tinun-an ni Hesus sa pagkadungog nila niining maong pangutana. Tingali maka ingun ta nga na “3 seconds” sila kung sa basketball pa. Maayo nalang nakatubag si Pedro, “Ikaw mao ang Mesiyas.”

Apan bisan pa ug tama ang maong tubag ni Pedro, wala niya kini masabti pag-ayo. Nganu man? Tungod kay bisan niingon siya nga si Hesus mao ang Mesiyas, apan ang iyang huna-huna ug panglantaw sa usa ka Mesiyas dili mao. Kay sama sa kadaghanan niadtong panahuna, ang iyang gihuna-huna usa ka politikanhong mesiyas nga moluwas kanila ug andam makig-giyera alang kanila. Busa kinahanglan unang ipasabot ni Hesus kanila, ang iyang pagkamesiyas. Miingun siya, kung buot kamong mahimong akong tinun-an, pas-ana ang inyong krus ug sunod kanako. Ulahi na sa dihang ilang nasayran o nadiskobrehan kung unsang klase nga Mesiyas diay si Hesus, gumikan sa iyang mga pulong ug mga gipangbuhat.

Sa laktud nga pagka-estorya, gihulagway karon sa atong Ebanghelyo ang tinuod nga mesiyas nga mao si Hesus- Siya nga mihatag sa iyang kaugalingong kinabuhi alang sa tanan. Mao usab kini ang gihulagway sa atong unang pagbasa diin gisaysay ang kinabuhi sa usa nga maayong tawo nga gipatay, ug diha na nila nasayran nga maayo diay siyang tawo human siya mapatay. Sama usab kini sa kasinatian ni Hesus.

Karon, kung ikaw ang pangutan-on kinsa man si Hesus alang kanimo? Tingali ang matag-usa kanato adunay managlahi nga ikatubag sama sa mga tawo kaniadto. Apan ang nakanindot niini kay sa atong panahon karon, dili na nato kinahanglan boakon ang atong ulo sa paghuna-huna ug tubag sa maong pangutana, tungod kay diha sa atong Simbahan, gihatag na kanato ang tubag niini. Ang kinahanglan lamang nga motoo kita, ug atong huptan ug barugan ang maong pagtoo — nga si Hesus mao ang Mesiyas, ang anak sa Diyos. Ug kung mitoo kita niini, nan, angay nga andam kita nga mosunod sa susamang pamaagi. Mao usab kini ang hagit sa atong ikaduhang pagbasa karong Domingoha, diin gihulagway si Hesus isip usa ka sinena (dress) nga maoy angay isul-ob sa matag Kristiyano.

Karon, pangutan-on nato ang atong kaugalingon: Kinsa man si Kristo alang kanako? Andam ba ako mobiya sa tanan aron mosunod kaniya? (Cristopher Alcayde)