Bangon Kamo Kay Manlakaw na Kita

Bangon Kamo Kay Manlakaw na Kita (Mt 26:46)
Pamahayag sa CBCP Tapos sa Piniliay

Mga Igsuon nga mga Lalake ug Basbaye dinha ni Kristo:

“Gihatag kanako ang tanang gahom sa langit ug sa yuta…” (Mt. 28:18)

Kini ang kinatas-an nga pag-angkon ni Jesus sa pangtanan nga pagkahari ug pagmando. Kini mao ang mga pulong sa Gibayaw sa Langit, mahimayaon nga nagalingkod sa tuo sa Amahan.

Nisulat kami kaninyo sa wala pa ang piniliay. Sa makausa pa nagsulat kami kaninyo karon nga natapos na ang piniliay.

Daghan nga mga pagsaway, gani puno og kaligutgot, nga mga tingog naghangyo kanamo sa pagdumili sa “ipagpanginlabot” sa politika. Dili kini mahimo. Wala kami mangandoy og katungdanan ni nangita kami niini. Dili gani kami makahimo og talaan sa mga dinihogan nga mga kandidato alang sa mga matuuhon nga katoliko. Apan paglimod kini sa pangtanan nga pagmando sa Ginuo kon idumili namo pagpahinumdom samga manununod Niya sa gipangayo Niya — lakip sa politika.
Nahimo na ang pagbotar ug naihap na ang mga boto.

Sa mga nakadaog og mga katungdanan, nagpasalig kami sa among mga pag-ampo, labi na alang sa kaalam, nga mag-aninaw sila sa kabubut-on sa Dios alang sa Iyang katawhan ug maisugon nga maghimo sa buot Niya. Ang kamot sa Dios ilhon dinha sa mga hitabo sa kasaysayan. Mao nga ipaiyaha ang kadaogan, dili sa inyong dungog ug pagkainila, kondili sa Dios nga nagtawag kaninyo pagpangalagad ug pag-atiman sa mga pinakahuyang ug gihasol. Dili maunyaunya ang pag-atiman sa mga bata. Ug daghang kababayen-an anaa gihapon sa mga kahimtang nga gipahimoslan. Mga lumad nagpabilin nga gipadaplin ug ang gipangandak nga paglambo dinha sa ekonomiya nagpaabot gihaponnga magmakahuluganon alang sa mga Pilipino nga anaa sa gawas sa mga dakbayan.

Sa mga napildi, kamo, isip mga tawo, isip mga anak nga lalake ug babaye sa Dios, labaw pa gyod kaayo kay sa mga puwesto nga inyong gipangandoy. Imbis magmagul-anon ug magmasulub-on, maghagit unta kamo sa inyong kaugalingon diha sa pagpangutana ngano man nga ang Nabanhaw nga Ginuo nagpadala man kaninyo sa “paghimo nga iyang mga tinon-an sa tanang kanasoran”. Anaa gyoy daghan nga uban nga mga paagi pagtukod sa Gingharian sa Dios. Anaa kaninyo pagkaplag sa inyong mga agianan, diha sa pagtuo ug sa pagka masunuron sa espiritu sa Dios.

Ang pinakadako nga saad nga matanyag kaninyo sa Simbahan mao ang mabinantayon nga pag-uban paglihok, ug kini among gihimo karon. Among awhagon ang mga tawo pag-uban paglihok sa pangamhanan alang sa kaayohan sa tanan, ug magpadayon kami pagkamabinantayon sa pagtudlo, pagbadlong, pagsaway, ug pagtudlo unsaon pagkinabuhig matarong–kay kini mao ang among tawag.
Bangon Kamo Kay Manlakaw Na Kita…

Gikan sa Hugpong sa mga Obispo nga Katoliko sa Pilipinas kon CBCP, Mayo 9, 2016

+ SOCRATES B. VILLEGAS
Arsobispo sa Lingayen Dagupan
Presidente, CBCP