E-CHAMP volunteer naglipay pag ayo

Human na gayud ang Piniliay. Busa ania ang usa ka testimonial sa usa ka e-CHAMP volunteer gikan sa Bansalan, Diocese of Digos, Mr. Loui Jay A. Pitpit.

Dear KNOT,

Hilabihan ang pagpangandam sa Team Bansalan nga volunteers sa e-CHAMP alang sa gipahigayon nga National and Local Elections. Dala ang akong appointment letter ug ID nga pinirmahan gayud sa Parish Pastoral Council for Responsible Voting (PPCRV), nisulod gilayon ako sa presinto kung diin gitahasan ko nga magbantay. Takna alas 6 sa buntag gisugdan ang pagbutar sa Bansalan Central Elementary School.

Walay mga dagkong kakulian ang nahitabo gawas lamang sa ginagmay nga aberya sa Voter’s Counting Machine (VCM) sama sa dili pagluwa niini ug resibo apan gilayon nga maayo.

Makalipay gayod sa dughan nga makakita sa mga epektibong magtutudlo nga gi-prioritize gayud ang mga senior citizens ug mga disabled. Disiplinado usab kaayo ang mga botante nga nagtarong gayud sa paglinya.

Dako usab kaayo’g natabang ang mga e-CHAMP voulunteers nga maoy nitabang pagpangita sa presinto sa mga botante.
Tulo ka mga senior citizens ang akong gihatod sa ilang tagsa-tagsa ka presinto human sila nagpatabang pangita sa ilang numero sa voter’s list.

Ang uban usab nga volunteers nitabang sa pag assist sa mga  botante nga wala pa masayod sa ilang presinto; 653 voters ang nakabotar sa akong presinto nga gibantayan.

Sa kinatibuk-an, malampuson kaayo ang gipahigayong piniliay sa Bansalan Central Elementary School. Walay naghimo ug salaod sama sa pagpamaligya ug boto. Makita sa mga dagway sa botante ang sinseridad sa pagboto maong miski gabie na kaayo, sige gihapon ug inihapay ang volunteers sa iskor sa mga kandidato gamit ang mga election returns nga gihatag sa matag presinto. -Loui

******

Daghang salamat Loui ug congratulations sa kapin 6,000 nga e-CHAMP volunteers sa Rehiyon XI. ‘Til next k’wentuhan higala! – Cheryl Vilog