Vox Populi, Vox Dei Part II

Sa miaging semana sa nagsingabot pa ang Piniliay 2016 sa Mayo 9, gilakbitan nako paghisgot ang “Vox Populi Vox Dei.” Magpadayon akong maghisgot niini.

Sa karon naklaro na ang mga midaog sa mga posisyon sa nasyonal nga kaggamhanan. Nagpaabot na lang sa opisyal nga proklamasyon sa National Board of Canvassers ug sa Kongresso. Sa laing bahin, ang kadaghanan sa mga midaog nga kandidato alang sa lokal nga panggamhanan na proklamar na sa ilang tagsatagsa ka board of canvassers.

Mainiton nga pagtimbaya sa Mayor sa Davao City, Rodrigo Duterte, ang gisaligan nga mahimong sunod nga Presidente natong tanan. Panalanginan unta siya sa Dios og maayong panglawas, Diosnong kinaadman, malumo nga kasingkasing, ug kaigmat sa pagpangulo.

Niining piniliay 2016, nagkabinugnuay gayud. Daghan ang nakapasakit ug daghan usab ang nasakitan. Ang “Election violence” nahimo na usab nga bahin sa atong piniliay. Ang uban pa gani, namatyan. Salamat sa Dios, wala kaayo na delay o na extend ang proseso, nadayon ra gayud. Ug natapos na ang gitawag nga bugnong lugaynon. Bisan adunay wala makaboto sa nagkalainlaing hinungdan,naghukom na ang haring lungsod. Giihap na ang mga boto, naay mga midaog ug naay mga nangapildi. Ang tanan angayan nang modawat sa kamatuoran – kadaogan man o kapildihan. Mopatigbabaw unta ang kamaayo ug pakigdait kay sa pagkahiubos, kasuko ug kalagot. Ang mga daog ug pildi magtinabangay na lang unta alang alang sa kaayuhan sa katawhan ug nasud, nga labaw pa sa ilang personal nga interes o pagbati.

Niining piniliay, mas daghan ang nangilabot ug miapil sa proseso sa pagpasibaw sa Vox Populi. Matud pa sa Comelec, mas taas ang porsyento sa “voters’ turnout” sa lokal ug overseas voting karon. Ug mas daghan pa jud unta, kon wala untay teknikal nga aberiya sa mga makina ug kommunikasyon. Nga dunay mga kandidato sama ni Duterte nga nakahatag ug paglaum sa lain nga klase nga pamunuan nakapadasig kuno sa daghan nga dismayado na sa panggamhanan ug miapil sa pimiliay. Klaro, kusog ug lanog ang Vox Populi.

Ang gipangandoy sa katawhan sa pagkab-ot sa maayong panggamhanan makatarunganon ug nahiuyon usab sa gidamgo sa Dios alang sa tanan niyang mga anak. Busa, nahiuyon sa Vox Dei. Kon hain ang pagtagad sa labing ubos, anaa ang Dios. Kon hain ang panag-uli, anaa ang Dios. Kon hain ang kahiusahan, anaa ang Dios. Kon hain ang kalinaw, anaa ang Dios. Kon hain ang pagpatunhay sa kinabuhi, anaa ang Dios, ubp.

Alang sa katumanan sa Vox Populi, Vox Dei, ang mga palarang gisaligan ug gilauman sa ilang mga supporters, kinahanglan nga magkugi gayod, ug magmaisogon ug matinumanon sa ilang mga gipanaad sa katawhan – nga magmaayo ug mausawagon pa ang ilang kinabuhi ubos sa panggamhanan sa mga napili nga mangulo sulod sa umaabot nga 3-6 ka tuig.

Magmaampoon kita ug magmabinantayon sa umaabot nga mga lakang ug buhat nga pagahimoon sa mga bag-ong piniyelan. Magpadayon nga mangilabot kita sa mga katikaran sa panggamhanan. Human nato sila gitugyanan sa atong pagsalig, ubanan nato sila ug supportahan sa ilang mga maayong tinguha aron molampos. Sawayon usab kon ilang pakyason ang atong pagsalig kanila. Dili nato sila biyaan ug pasagdan, unya balikan na lang sa sunod piniliay.