Vox Populi, Vox Dei

“Ang tingog sa tawo maoy tingog sa Dios” maoy binisaya niining panultihon. Niining umaabot nga piniliay, ginagamit kini sa pipila, sa paghatag kahulugan sa mahimong resulta sa mga survey sa mga tawo bahin sa ilang pilion sa umaabot nga piniliay. Gigamit usab kining panultihon sa pagtagna sa mahimong resulta sa piniliay, nga sa katapusan, kinsa ang modaog ug mapildi, magdepende ra gayud sa pagbuot sa Dios. Ang gipasabot ba niini, padaghanay ra sa gidahanon sa mosalig ug moboto. Ang mas daghan boto ug midaog maoy tingog sa Dios?

Una sa tanan, unsa diay ang gibasihan sa “vox populi”? Kasagaran, akong obserbasyon ang vox populi nagdepende sa resulta sa mga binayran nga “survey.” Daghan ang mga tawo nga mag-agad niini sa ilang pagpili. Maniguro ba, nga modaog pud sila, pohon.

Ang lain nakong obserbasyon mao nga tungod kay daghan pa gihapon ang madala sa panghadlok, pagpamalit, o pagpamugos, apil pa gani ang paglingawlingaw, ang resulta sa “vox populi” dili kasaligan nga gawasnon ug kinaugalingon nga hukom, kon dili hukom sa mga gamhanan, sapian ug dungganan, nga maoy nagmando sa mga ubos ug kabus.

Ang tinuod mao kini. Ang tingog sa tawo mahimo lamang nga tingog sa Dios usab, kon ang hunahunahuna ug hukom sa tawo nahiuyon ngadto sa Diosnong hunahuna ug pagbuot. Dili ba sa atong pag-ampo sa “Amahan namo” moingon kita matuman ang IMONG pagbuot dinhi sa yuta maingon sa langit.

Sa umaabot nga piniliay, magampo gayud kita pagayo nga lamdagan kita sa Dios aron masayran nato ang iyang pagbuot bahin sa kinsa ang atong pilion nga mangulo sa panggamhanang nasyonal ug lokal alang sa kadayganan sa Dios ug kaayuhan sa tanang tawo, maayo ug dautan. Kay buot sa Dios nga ang TANAN maluwas.

Kinsa kaha sa mga kandidato ang gikahimut-an sa Dios nga angay natong pilion. VOX POPULI, VOX DEI.