Parokya sa Babak Mihangyo ug Pakitabang alang sa mga Mag-uuma sa Babak

Nangayo karon ug pakitabang nga kura paroko sa Babak, nga si Msgr. Nelson Lucas ngadto sa Archdiocesan Social Action Center alang sa mga mag-uuma kinsa biktima karon sa hulaw kon ang gitawag nga El Nino Phenomenon.

Daling gisubay sa Archdiocesan Social Action Center (ASAC) ang sobra sa 100 ka mga mag-uuma sa dihang nadawat ang sulat pakitabang nga gidala pinaagi sa Caritas.

Giubutyag ni Sr. Marissa Arado, TDM sa ASAC nga “Gipadangat sa Caritas ang hangyo sa pakitabang sa 116 ka mga apektadong mga mag-uuma sa Babak mao nga gipadala gilayon ko ni Fr. Bong (Dublan) aron nga susihon ang matuod nga kahimtang sa mga mag-uuma.”

Nasuta ni Sr. Marissa nga ang labing dakong panginahanglan sa mga mag-uuma sa Babak mao ang binhi ug tubig, “Binhi aron nga makapananom sila, apan mas ginikinahanglan nila ang tubig aron nga mabuhi ang binhi nga ilang itanom.”

Sa pagpanubay, nasayran usab nga ang uban sa mga mag-uuma, napugos na lamang sa pagdugkal sa ilang mga lagutmon sama sa balanghoy ug lutoon kini ngadto sa gitawag nga “sitsiritsit.”

Human sa personal nga pagbisita ug pagpakighinabi, gitakdang isumitir na ang mga rekomendasyon alang sa mga konkretong mga lakang nga pagahimoon alang sa maong kahimtang.