Ika-18 nga kasumaran sa St. Camillus Hospital

Ika-18 nga kasumaran sa St. Camillus Hospital
Ang ika-18 nga kasumaran sa St. Camillus Hospital ang gisaulog niadtong Abril 18, 2016 sa dakong diwa sa pagdasig ug pagpasalamat nga gikutlo sa tulo ka pulong nga – Inspired – Empowered – Revitalized. Gihalad ang bug-os nga pagpasalamat ngadto sa Ginoo pinaagi sa Stos. nga Misa alas 9 sa buntag sa kapilya sa mga Martires, pinangunahan ni Obispo Emerito sa Mati Patricio H. Alo, inubanan sa upat nga mga pari sa kongregasyon sa Ministers of the Infirm(MI)—sila si hospital director Fr. Marven Ruyeras, assistant Fr. Eric Tampis, ang community superior Fr. Ruben Mandin, ug ang vicar provincial ug Director of Camillian Health Institutions gikan sa Manila Fr. Evan Paul Villanueva, MI. Si Fr. Evan, ang homilist, nag-storya usab niadtong panahon sa tuig 1990 kanus-a usa pa siya ka seminarista nga mibisita sa diyosesis sa Mati ug maoy gipadad-an ni Bishop Alo sa unang sulat ngadto sa superior sa mga paring Camilyano si Fr. Ivo Anselmi, nga naghangyo nga tukoron ang usa ka balay tambalanan sa Mati, ug kini natuman ra gayud sa 1998, walo ka tuig human sa iyang pagduaw sa Mati, kanus-a natukod ang naasoyng ospital. Sa gabii, gipahigayon ang usa ka programa ug panihapon sa Greg’s Function Hall alang sa tanan, nga nahimo usab timaan sa pagtapos sa tuig sa mga trabahante o St. Camillus Year of Hospital Personnel.  Sa maong tulumanon, gi-award og mga plake ang mga 20 nga mga trabahante nga nakatanyag og 10, 15, ug 18 ka katuigan sa panerbisyo. Miawit ug gipremyohan usab ang midaog sa ilang Tawag nga Tanghalan nga si OIC security guard Nazario Pale. Sa katapusan, nag-paambit og mga mensahe sila si Fr. Evan, Marven ug Eric nga parehong nagsulti sa ilang pagka-inspired tungod sa dakong kakugi sa personnel, nga gipanghinaot usab nila nga magpadayon sa ilang maayong panerbisyo hangtud sa mosunod nga mga katuigan, samtang dili ikalimod usab ang daghang mga panalangin gikan sa kahitas-an.

Davao Oriental a Filariasis-free Province
Natigayon niadtong Abril 20, 2016, didto sa Provincial Covered Court sa Capitolio ang deklarasyon sa Davao Oriental isip usa ka filariasis-free province. Natigayon kini human nga malampusong natamod sa probinsiya ang tanang mga gikinahanglan aron mamahimong gawasnon sa sakit nga filariasis, ug human mipasar ang probinsiya sa 2015 DOH Transmission Assessment Survey. Gibutyag pa ni Dr. Joy Sanico sa Prov’l Health Office, nga Dvo. Or. mao ang ikatulong probinsiya sa Dvo region nga nadeklara isip filariasis free. Ang okasyon ang gipangunahan mismo nila ni Dr. Winston Palasi sa DOH central office, ug Regional Director Dr. Abdullah Dumama, Jr. Atol usab sa okasyon, natigayon ang unveiling sa mga selyo sa probinsiya isip usa ka malaria ug filariasis-free province. Gidugang pa ni Sanico nga kining maong kalambuan ang subling nagmatuod sa pagtutok sa probinsyal nga panggamhanan sa nag-unang development agenda nga mao ang serbisyo sa panglawas.