Espiritu Santo, Tuburan sa Kahiusa

Domingo sa Pentekostes
Buhat 2:1-11/ Ps. 104/ 1 Cor. 12:3b-7, 12-13/ Jn. 20:19-23

Gisaulog sa tibuok Simbahan sa kalibutan karon ang Domingo sa Pentekostes. Kini ang giila nga kahimugsuan sa Simbahan diin gigasa sa Ginoong Hesukristo ang Espiritu Santo nga tuburan sa kahiusa sa iyang katawhan.

Sa unang pagbasa, nagkasinabot ang nagkadaiyang katawhan gikan sa nagkalain-laing lugar sa kalibutan. Dili babag kanila ang panaglahi sa ilang gigikanan ug sinultihan. Sa ikaduhang pagbasa, ang presensiya sa Espiritu Santo sa matag-usa naghimo sa katawhan nga sama sa usa ka lawas. Taliwala sa nagkalain-laing bahin sa lawas, kini buhi ug molihok nga hiniusa bisan sa nagalahi nga buluhaton sa mga parte niini. Sa Ebanghelyo, ang kalinaw maoy timailhan sa gihiusang katawhan sa Dios. Ang Espiritu Santo maoy naghatag kanila sa gahum sa pagpasaylo nga magdala kanila sa kahiusa sa Dios ug sa isigkatawo.

Human ang piniliay niadtong miaging Lunes, ato untang paninguhaon ang tinuod nga kahiusahan sa nasud nga Pilipinhon. Bisan dunay panaglahi ang atong pagpili sa mga kandidato sa milabay nga piniliay, bisan lahi-lahi ang atong giboto, ug bisan dunay mga sakit nga mga pulong sa pagbinayloay ang nasulti sa matag kandidato ug partido, maninguha kita nga molihok karon sa hiniusa. Tabangan nato ang matag-usa nga makapasaylo ug makig-uli aron maangkon nato ang hiniusang lihok alang sa kalamboan. Dili unta maghari ang kagubot ug pagdumot kondili ang pagpasaylo ug pagtinabangay aron kitang tanan molambo.

Iampo nato nga ang Espiritu Santo nga dili nato makita apan naghatag kanato’g direksiyon maglamdag unta sa matag-usa kanato. Walay kalamboan ug kabag-ohan sa atong katilingban ug nasud kung kita magkabahin-bahin ug magdumili sa pagtambayayong. Sama sa unang matuohong katilingban nga gitigom ni Hesukristo, magkasinabtanay unta kita ug mahimong usa ka lawas, magpuyo ug magpatunhay sa gasa sa tinuod nga kalinaw. Tugutan ta ang Balaang Espiritu nga maoy mahimong tuburan sa kahiusa.