Pahinumdom sa COMELEC sa mga Kandidato

Subling nagpahinumdom karon ang Commission on Elections (COMELEC) sa siyudad sa Mati ug probinsya sa Davao Oriental sa tanang mga hingtungdan, partikular na mga kandidato nga motamod gayod sa pagbutang sa mga campaign materials sa mga designated common poster areas. Giluwatan kini sa COMELEC human napanid-an nga daghan sa mga campaign materials karon, sama sa mga streamers, ang nabutang bisan asa na lang, ug wala nasubay sa nahisgutan nga guideline sa commission. Labot ni-ini, gitambagan karon sa COMELEC ang mga kandidato nga pahinumduman gayod ang ilahang mga supporters ug mga lumilihok nga motuman gayod sa mga pamalaod sa Comelec.

Na-una ini, nagpagawas na ug talaan ang Comelec sa mga common poster areas, paartikular na sa kinatibuk-ang 26 ka barangay sa siyudad sa Mati. Gawas sa pagbutang sa mga campaign materials sa mga common poster areas, gikinahanglan usab matud pa, nga motamod sa gidak-on sa mga materials ang mga kandidato.

Sa samang bahin, gisugyot usab ni Vice-Governor Mayo Almario ang pagpahigayon og debate o candidates fora alang sa mga local candidates sa nagsingabot nga pinili-ay. Gipasabot pa sa Opisyal nga kini aron makabaton usab og higayon ang mga kandidato nga ikapasabot pa ang ilahang mga panlantaw, o plataporma de gobyerno ngadto sa katawhan nga mao’y mamahimong giya sa pagpili nila alang sa nagsingabot nga eleksyon. Gidugang pa niya nga angay nga manguna ni-ini ang mga independent organizations, ug usa sa mga gisugyot niya nga mopahigayon ni-ini ang Clergy. Na-una ini, gipahayag usab ni Comelec Chair Mr. Sergio Manligoy nga andam kaayo ang Commission sa pagbuhat sa ingon apan pinasubay sa ilahang kasinatian, lisod na tapukon ang mga kandidato alang sa maong katuyuan. Kahinumduman nga sa miaging mga eleksyon, gihimo ang nahisgutang Candidates Fora sa St. Therese Gym, Clergy House Compound, Madang, Mati City.