Koordinasyon tali sa Simbahan ug Militar ang Ginalihok

Koordinasyon tali sa Simbahan ug Militar ang Ginalihok

Padayong ginalihok karon sa Philippine Army ang hugot nga pakig-coordinate sa simbahan, particular sa Catolikong kahugpongan, agig pagtamod sa ilang panlantaw nga makig-usa sa mga pagpaningkamot sa simbahan alang sa usa ka hapsay ug malinawon nga pagpanginabuhi sa kinatibuk-ang probinsiya, nga mao’y naglangkob sa Diyosesis sa Mati. Giluwatan kini ni Col. Bienvenido Datuin, Jr., ang brigade commander sa 701st Infantry brigade sa Phil. Army nga naka-base sa Sitio Magay, sakop sa brgy. Don Martin Marundan, sa siyudad sa Mati. Na-una ini, gipasabot na sa mga kadagkuan sa Phil. Army, sa pagpanguna ni Maj. Gen. Rafael Valencia, nga tinguha nila karon nga makig-alayon sa mga relihiyosong sector alang sa maong katuyuan. Gidugang pa sa Opisyal nga sa pag-adto sa mga kasundaluhan sa mga barangay alang sa ilahang pakig-sandurot sa katawhan agig kabahin sa pagpatunhay sa Peace and Dev’t Outreach Program (PDOP), ang mga Gagmayng Kristohanong Katilingban (GKK) sa simbahang Katoliko ang nalambigit na ni-ini. Tungod ni-ini, gikinahanglan nga masayod usab ang mga sundalo sa mga pamaagi, mga mekanismo, ug operasyon sa mga GKKs. Maoy hinungdan nga plano karon sa Phil. Army nga mopatin-aw sa usa sa mga binulan nga pulong sa kaparian kon Presbyterium aron ikapdayag ang estado sa maong pagpaningkamot.

PDOP kinahanglan usab reviewhon

Gisulti usab ni 701st IB Commander Col. Bienvenido Datuin nga kinahanglan reviewhon ang ilahang Peace and Dev’t Outreach Program (PDOP). Gipasabot pa sa Opisyal nga gikinahangaln nga ma-review ang rationale sa programa, mga gimbuhaton sa matag hingtungdan, aron usab mas mapalig-on pa kini. Dugang pa ni-ini, gipahayag ni Datuin nga hugot usab nilang ginatamod karon ang ilahang focused military operations, ang pakiglambigit sa mga stakeholders, aron mahingpit ang ilahang mga pagpaningkamot nga ikapatunhay ang kalinaw. Na-una ini, gipahayag pa sa brigade commander nga tinguha sa rebeldeng grupo nga makuha pagbalik ang masa, apan giduso usab niya nga nakita na karon sa katawhan ang serbisyo sa gobyerno, ug ang pagpaningkamot nga mopaduol pa sa katawhan.