Dominggo sa Pagampo alang sa Bokasyon

Sa 2016 nga kasaulogan sa Dominggo sa Pagampo alang sa Bokasyon, si Papa Francisco naghatag og mensahe bahin sa papel sa Simbahan, isip inahan, sa panaw sa bokasyon. Ania mosunod ang akong nakutlo:

Una, ang bokasyon magsugod diha sa Simbahan. Magasugod ang kaamguhan sa bokasyon nga dunay kamatngonan ug pagsabot sa kinabuhi ug kaakuhan sa Simbahan. Ang gitawag, makaila nga diha sa iyang katilingban ug pamilya nagsugod ang iyang partikular nga pagtawag, nga lahi sa tawag sa uban. Masabtan niya ug mahatagan og bili ang lainlain nga mga bokasyon diha sa Simbahan ug sa kalibutan.

Ikaduha, ang bokasyon molambo sulod sa Simbahan. Diha sulod sa Simbahan masinati sa tinawag ang lainlain nga mga gasa sa Spirito alang sa kaayuhan sa Simbahan. Mahinungdanon ug kinahanglan gayud nga ang tinawag adunay kasinatian ug paghatag bili sa lailain aspeto ug hut-ong sa Simbahan. Ang Simbahan maoy labing bilihong dapit diin ang bokasyon molambo.

Ikatulo, ang bokasyon malig-on diha sa Simbahan. Alang sa mga mitubag ug mitahan na sa kaugalingon ngadto sa Ginoo, adunay Inahan sa ilang panaw sa bokasyon. Ang Simbahan Inahan sa bokasyon pinaagi sa makanunayong pagampo alang sa bikasyon. Inahan usab siya pinaagi sa iyang pagumol sa mga tinawag aron mamahimo silang mga maayong misyonerong sumusunod ni Jesus. Sa masusing pagpili sa angayan nga dawaton sa Orden sa pagkapari ug sa konsagradong kinabuhi, ang Simbahan Inahan alang niining mga bokasyon. Sa katapusan, Inahan ang Simbahan pinaagi sa iyang mapaduyong pagsuporta sa bokasyon ug misyon sa mga tinawag, pinili ug pinadala.

Pag-ampo ni Papa Francisco alang sa 2016 nga kasaulogan sa Dominggo sa Pagampo alang sa Bokasyon

Amahan sa kalooy,
Gihatag mo kanamo ang imong Anak alang sa among kaluwasan,
Ug kanunay kang nagalig-on kanamo
pinaagi sa mga gasa sa imong Spirito.

Tagai kami og mga Kristohanong katilingban,
nga buhi, madasigon ug malipayon,
mga tuburan sa inigsoong panaglambigitay,
Ug nagadasig sa mga batan-on nga motahan sa kaugalingon ngadto kanimo,
Ug sa pagsangyaw sa Ebanghelyo.

Palahutaya kining mga katilingban
nga mohatag og saktong katekesis sa bokasyon,
Ug sa mga pamaagi padulong sa ilang pagtugyan sa kaugalingon.

Ihatag ang kinaadman nga kinahanglan, aron madawat ang bokasyon,
aron sa tanang butang, ang kadako sa imong maloloy-ong gugma mosanag sa tanan.

Itugot nga si Maria, Inahan ug Giya ni Jesus,
mangamuyo alang sa matag Kristohanong katilingban,
aron human mahimong mabungahon sa Spirito Santo,
mahimo siyang sukaranan sa tinuod nga mga bokasyon
Alang sa pagpangalagad sa balaang katawhan sa Dios. Amen.

(Gihubad nako gikan sa Ininglis)