Kung kita may gugma, dunay bag-ong langit ug yuta

Ikalima nga Domingo sa Pagkabanhaw
Buhat 14:21-27/ Ps. 145/ Gipadayag 21:1-5a/ Jn. 13:31a, 34-35

Samtang nagkaduol na ang piniliay sa nasud nga Pilipinhon, daghang mga pulong ug lihok nga maayo ang atong nasaksihan. Ang kaniadtong mga kaaway nga partido ug kandidato sa politika karon managhigala na. Ang mga nanagan aron magpapili, nanaad nga mapalingkawas sa kalisod ang katawhan, maatiman ang kinaiyahan ug mapalambo ang kahimtang sa nasud.

Kining nindot nga mga pulong o saad ug mga buhat sa panagtinabangay matuman lamang kung tinuod nga paghigugma ang nagtukmod. Mao kini ang nahitabo sa mga apostoles diha sa unang pagbasa. Ang ilang tinuod nga paghigugma sa misyon nga gisangon ni Kristo kanila, nakapalahutay kanila taliwala sa mga babag ug hagit nga ilang nasinati. Nagpadayon sila nga malipayon sa pagsangyaw sa gingharian sa Dios sa walay pagsapayan sa kapait nga nahiaguman.

Kining maong gugma dinasig sa panglantaw nga ugma damlag makab-ot ra ang bag-ong langit ug yuta. Kini nadungog nato nga gipadayag diha sa ikaduhang pagbasa. Matag luha pahiran ug wala nay kamatayon. Ang tanan mabag-o.

Ang sugo ni Kristo sa paghigugmaay mahimong tinuod nga bag-o kung ang matag politiko nga magpapili adunay gugma nga sama kang Kristo. Kanang gugma nga dili maglantaw ug pansariling kasigurohan lamang kondili andam nga magpasakit aron mabulahan ang kadaghanan. Kini nga gugma mahitabo kung ang magpapili dili mobawi sa ilang nagasto human sila molingkod sa pwesto kondili maghuna-huna sa kaayohan sa kadaghanan.

Ang paghigugmaay sa isigkatawo nga gisugo ni Kristo matuman lamang kung ang mga botante dili mahadlok sa hulga sa mga politiko ug dili magpadala sa ilang mga haylo. Kini matuman kung ang mga botante mobarug sa unsay tama sumala sa dikta sa ilang konsensiya. Ang kahadlok ug utang kabubot-on dili maoy sukod sa tinuod nga gugma tungod kay ang gugma gawasnon man. Diha lamang sa tinuod nga gugma atong maangkon ang tinuod nga bag-ong langit ug yuta.