Sto Nino Parish, solemne nga gisaulog ang kuwaresma ug sadya nga giselebrar ang pagkabanhaw ni Hesus

Sa wala pa miabot ang Biyernes Santo, ang adlaw kung kanus-a namatay si Hesus tungod sa atong mga sala, hingpit nga giobserbar sa mga parokyano sa Sto Nino Kaputian Parish ang importansya sa kuwaresma, ang saktong panahun nga kita mamalandong ug maghinulsol sa sala nga nabuhat. Tungod niiini nagpahigayon ang parokya ug kumpisal kaniadtong Marso 19, 2016 sa Sto. Nino Parish diin adunay 5 ka pari nga gikan sa nagkadaiyang parokya ang migahin ug panahon alang sa mga parokyano nga buot mangumpisal.

“Ang tumong niini mao ang tinguha nga madawat nato ang gugma og kalooy sa Ginoo ug mapaambit kini sa uban ilabina niining tuig sa yubileyo sa kalooy. Kung kita nakasala, mangayo ta ug pasaylo ug kung kita nasad-an mupasaylo usab kita”. Ingon ni Fr. Rico Enriquez, kura paroko sa Sto Nino Kaputian Parish.

Si Hesus mao ang Alpha og Omega. Ang sinugdanan ug ang katapusan. Kini nagpamatuod lamang nga si Hesus mao ang paglaum, kalipay ug manluluwas sa katawhan. Siya namatay ug nabanhaw. Sa adlaw nga siya nabanhaw, sadya gayod kaayo nga gisugat sa Sto Nino Parish ang pag-abot ni Hesus gikan sa kamatayon.

Untop sa alas 3:30 sa kaadlawon, dili maihap nga mga parokyano ang misaksi sa pagsugat o ang pag-engkwentro nila ni Hesus og Mahal nga Birhen Maria gikan sa kamatayon ni Hesus. Kapin kon kulang sa 60 ka mga bata ang miapil isip mga anghel sa maong pag-engkwentro diin dala-dala sa mga batang anghel ang mga bulak nga giandam sa pagsadya sa punto nga magsugat na si Hesus og Birhen Maria.

“Kining atong ginabuhat karon nga sugat o engkwentro, nindot gayod kaayo tungod kay makahatag kini nato karon og lesson sa atong espirituhanong kinabuhi kung unsa gayod ang importansya sa personal encounter with the Lord pinaagi sa pag-ampo ilabina sa pagtambong sa balaan nga misa matag dominggo. Kay kini makapalig-on sa atong pagtoo ug makapalambo sa atong espirituhanong kinabuhi,” ingon ni Fr. Rico Enriquez.