Itaktak ang pukot sa tuo sa sakayan ug makakuha kamo

April 10, 2016
Jn 21:1-9
Ni: Reb. P. Calexto Peligrino, SDV

“Itaktak ang pukot sa tuo sa sakayan ug makakuha kamo” Jn. 21:6.

Si Hesus mipakita na usab sa iyang mga tinun-an sa ikatulong higayon gikan sa iyang pagkabanhaw didto sa lanaw sa Tiberias. Niining bahin sa Ebanghelyo, ang iyang pagpakita sa mga tinun-an isip ang Nabanhaw nakapahinumdum nato pagbalik sa mga panghitabo sa dihang si Hesus nagsugod pagpanawag sa iyang mga tinun-an diha gihapon sa maong lanaw: Iyang gisugo sila sa pagtaktak sa ilang pukot sa tuong bahin sa ilang sakayan bisan pa man sa ilang wala magmalampuson na kasinatian sa pagpanagat nianang gabhiona (cf. Lk 5:4-11). Ug dihadiha, sa sugyot ni Hesus, nakakuha sila og daghang mga isda.

Sa nagkalain-laing mga kasinatian sa mga tinun-an sa nabanhawng Hesus, kining kasinatian sa pagpangisda maoy naghatag kanila og kabag-ohan nga pagsalig kang Hesus ug pagtahan sa ilang kinabuhi kaniya, daw ikaduhang tawag sa mga apostoles. Ang maong kasinatian nagtudlo kanila nga ang ilang pagbalik sa ilang kaniadtong buhat, sa dihang wala pa sila natawag ni Hesus, dili gayod magmabungahon kung wala Siya. Siya mismo ang naghatag niini ug bag-ong kahulugan ug katumanan: “sukad karon mahimo ikawng mananagat sa mga tawo” (Lk. 5:10).

Diha sa atong pagpaningkamot sa pang-adlaw-adlaw nato nga pagpanginabuhi, ato usab masinati nga kung wala ang Ginoo o kon dili kita musonod sa Iyang kabubot-on, dili gayod kita magmalampuson. Diha nato mapamalandongan nga ang atong pagpaningkamot wala gayod kalambuan kung ato kining gisagulan sa dili tinarong nga pamaagi: pagpanikas, pangdaot, pagpangawat ug tanang klase sa pagpanlimbong. Mao na kawan lamang ang atong pagpaningkamot kung kini wala mahisubay sa Iyang sugo kanato ug nga wala kini panalangin gikan Kaniya. Ang hagit sa Ebanghelyo naglamdag kanato sa pagsunod kanunay sa kabubot-on sa Diyos diha sa atong tagsa-tagsa nga pagpaningkamot aron Siya na mismo ang magpanalangin kanato.