Sunda ang Dios, dili ang tawo

Ikatulo nga Domingo sa Pagkabanhaw
Buhat 5:27-32, 40b-41/Ps. 30/Rev. 5:11-14/Jn. 21:1-19

“Pag gusto, maraming paraan; pag ayaw maraming dahilan.” Kung gustuhon gyud nato, ang paagi daghan, apan kung dili, daghan ang hinungdan. Kini usa ka riyalidad nga sagad atong ginabuhat bisan wala kita usahay nakabantay niini.

Sa kinabuhi sa mga apostoles, gusto nila nga mosunod kang Kristo. Gusto nila nga mosangyaw sa Maayong Balita. Gusto nila nga dunay kabag-ohan ang katilingban. Gusto nila nga mahapsay ang dagan sa kinabuhi. Gusto nila nga dunay kaluwasan. Mao gani nga misakripisyo sila sa daan nila nga kinabuhi isip mga mananagat, isip kobrador sa buhis, isip yano o makasasala nga tawo. Kini tungod kay gusto nila nga mosunod kang Kristo. Tanan ilang gibuhat aron matuman ang ilang gusto.

Apan sa dihang napukan ang tanan nilang pangandoy tungod kay si Kristo gipatay, tungod kay nahanaw ang ilang gituohan nga mabag-o ang katilingban, tungod kay nawad-ang sila’g paglaum nga sila maluwas ug mahapsay ang dagan sa kinabuhi, sila nagtuman na lamang sa ilang gusto. Sila mibalik sa naandan nilang kinabuhi. Mao nga nanagat na lamang sila.

Apan sa pagtuman nila sa ilang gusto, wala silay nakuha. Maayo na lang mituman sila sa gusto ni Hesus nga itaktak ang ilang pukot. Salamat kay sa ilang pagtuman nga itaktak ang ilang pukot, sila nakakuha ug daghang isda. Si Pedro, human gituman ang iyang gusto nga ipanghimakak si Kristo, karon magtuman na sa gusto ni Kristo nga mao ang paghigugman kaniya ug pag-atiman sa Kristohanong panon. Ang mga tinun-an mituman sa pagtudlo kang Kristo bisan pa man sa pagbabag sa mga kadagkuan.

Sa atong kinabuhi, kinsa kahang gusto ang atong gituman? Ang ato bang gusto nga manglaba lang una o ang gusto sa Dios nga motambong kita sa Kasaulogan ang atong gihimo? Ang ato bang gusto nga magpahayay lang unsa sa balay o ang gusto sa Dios nga kita mosimba ang atong gituman? Ang ato bang gusto nga magdumot o ang gusto sa Dios nga mopasaylo ang atong gibuhat? Ang ato bang gusto nga manimalos ug manghambot o ang gusto sa Dios sa pagpaubos ang atong gipuy-an? Ang ato bang gusto nga alagaran o ang gusto sa Dios nga kita moalagad ang atong gipaningkamutan?

Diha lamang sa pagsunod sa gusto sa Dios ug dili sa tawo kita makaangkon sa kinabuhing naluwas.