Youth Day Nagmalampuson

Nagmalampuson ang gihimong panagtapok sa mga kabatan-onan gikan sa mga parokya nga sakop sa Bikaryato sa Most Sacred Heart of Jesus, Calinan.

Gilangkuban kini sa 8 ka mga parokya; ang parokya sa Most Sacred Heart of Jesus, San Isidro Labrador, San Francisco de Asis, San Miguel Archangel, Mary help of Christians, St. John Paul II, San Pedro Calungsod ug ang parokya sa San Roque sa Malabog kon diin gipahigayon ang maong panagtigum, kini gisalmutan ug 337 ka mga kabatan-onan nga abtik ug madasigong mi partisipar.

Ang maong panagtapok gisugdan ug usa ka parada sa mga deligado ug giduyugan ug banda padulong sa parokya kon diin gisugdan ang usa ka adlaw’ng programa.

Matud pa ni John Bert Tumongha, ang Coordinator sa maong bikaryato, nga ila gayong gipaningkamotan nga mapatigayon ang maong panagtapok tungod kay walay gipahitabong sama niini sa milabay’ng tuig tungod sa mga kakuliang dili malikayan.

Pinaagi sa hiniusa ug dakong suporta sa ilang mga kaparian nga gipangunahan ni Rev. Fr. Jojo Ortiz nahimong malampuson ang maong aktibidadis. Ang maong panagtapok gadala sa temang “Blessed are the Pure and Merciful in Hearts for they shall see God”.

Ang usa ka adlaw’ng panagtigum gitunga sa duha (2) ka bahin: sa buntag kon diin mipaambit si Dennis Asumbrado sa sitwasyon sa mga kabatan-onan karung panahuna, ug sa hapon kon diin dinhi masukod ang ilang panagtambayayong ug diskarte.

Matud pa ni Seminarian Christopher Alcayde “Ang maong Vicariate Youth Day (VYD) usa ka nindot ug haum nga pamaagi aron mapukaw ang kasing-kasing ug galamhan sa mga kabatan-onan, ug ang interes ug kadasig sa mga partisipante, makaingon ko nga dili gayud diay kita mawad-an ug paglaum, makasalig kita nga aduna kitay kabinlan sa kaugmaon sa atong Simbahan ug isip kabahin sa Working Committee dili sayon ang paghimo sa mga preperasyon, apan sa katapusan makaingon ko nga WALA MAKAWANG ANG TANAN!” dugang pang pamalandong ni Sem. Christopher.

Ang maong kasaulogan gitapos sa usa ka misa kon diin dili makita sa hulagway sa mga partisipante ang kakapoy, kon dili ang kalipay ug kadasig sa pagpadayun sa maong misyon sa pagserbisyo sa mga kabatan-onan sama nila bisan sa kalinghud sa ilang pangidaron ug kaagi. (Jane Imas)