Covenant Peace Signing gihimo sa Siyudad sa Mati

Natigayon niadtong Marso 17, 2016 sa Pelaez Activity Center or City Hall Compound, ang covenant peace signing alang sa siyudad sa Mati. Naandan na kini sa nangagi nga mga eleksyon agig pagduso sa kabililhon sa kalinaw sa kinatiabuk-ang panahon sa eleksyon. Alang sa kalihokan nga gitambongan usab sa newsteam sa DXHM/DXDV ug TCTV Catholic media, gidapit ang mga kandidato, hilabi na kadtong anaa sa siyudad alang sa pagpirma sa maong mahinungdanon ug tulukibon nga kasabutan. Na-una ini, gipahayag ug gipasabot ni City of Mati Election officer Sergio Manligoy nga andam usab ang Comelec nga magpasiugda og usa ka candidates’ forum, apan aminado siya nga lisud gayud nga matapok ug usahon ang mga kandidato alang sa maong katuyuan sa lokalidad. Sa miaging mga eleksyon, ang DXHM/DXDV ug TCTV sa pakig-alayon sa Social Action program sa diyosesis sa Mati ang maoy mipasiugda sa Candidates’ Fora alang sa managlahing mga partido sa probinsiya sa Davao Oriental. Ang Covenant peace signing ang hiniusang pagpaningkamot sa Commission on Elections (Comelec) sa siyudad ug probinsiya, ug sa kasundaluhan pinaagi sa Philippine Army (PA) ug sa Philippine National Police (PNP).

Sa voters’ biometrics – ang siyudad sa Mati adunay 73,912 voters nga kwalipikado sa pagboto human nga na-comply nila ang biometric registration, samtang 3,493 ang dili na makaboto tungod sa wala pagtuman sa rekisito sa validation sa Comelec. Ug ang probinsiya sa Davao Oriental aduna nala’y 319,942 qualified voters human nga 17,863 ang nawad-ag katungod sa pagboto tungod sa wala pagtahan sa biometric registration nga gipahimo sa poll body. 44 ka adlaw na antes sa May 9 election ug gipahigayon ang series of meeting sa Comelec tali sa PNP ug AFP alang sa pagpalig-on sa mga lakang para sa usa ka limpiyo ug malinawon nga synchronized national and local elections. Gipasalig  usab kini sa mga kadagkuan sa militar nga sila si PA 701st Brigade Commander Col. Bienvenido Datuin ug Davao Or. PNP Provincial Director Harry Espela.