PSAM Coordinators gi-aghat nga maghimo ug mga Corporal Works of Mercy

Gi-aghat karon ang mga parish coordinators sa Social Action Ministry (PSAM) nga maghimo ug mahinungdanon nga corporal works of mercy.

Kini maoy gipasabot ni Fr. Leonardo Dublan, director sa Archdiocesan Social Action Center sa mga PSAM coordinators gikan sa 38 ka mga parokya atol sa binulan nga panagtagbo, Sabado Marso 12, 2016 sa San Pedro Cathedral Auditorium.

“Kinahanglan nga hatagan ninyo ug prayoridad ang tulo ka prinsipyo sa social action, ‘SEE, JUDGE and ACT’,” si Fr. Dublan nagkanayon, “mag-una ang pagbisita, paminaw, tan-aw sa kahimtang sa atong gusto nga hatagan ug hinabang.”

Human niini, Si Fr. Dublan miingon, “mao ang pag-abli sa huna-huna base sa kasinatian ug diha lamang sa panudlo sa Simbahan.”

Ug sa katapusan mao ang pag-desisyon kung unsa nga aksiyon ang pagahimoon nga maggikan gayud sa experiyensa sa mga nahaunang mga lakang.

“Kamo mismo, akong pangutan-on, mabuhat ba ninyo kini?,” pangutana ni Fr. Dublan sa mga PSAM coordinators kinsa mitubag, “Yes!”

Gisugyot ni Fr. Dublan nga respetoon ang intensiyon sa mga kinasingkasing nga mihatag alang sa Alay Kapwa gikan sa Pundok Banay kansang tumong mao ang makatabang sa mga parokyano kinsa giila nga mga tawo nga walay kahinughaan sa kinabuhi lakip na ang kadtong anaa sa mga institusyon sama sa mga prisohan o rehabilitation centers, orphanages o halfway house sa mga latagaw nga kabataan, home for the aged ug uban pa.

“Ang labing importante sa tanan mao nga sa pagbuhat niining gitawag nga corporal works of mercy, dunay mahitabo nga epekto sa pagbag-o o conversion sa usa ka tawo,” Si Fr. Dublan namahayag.

Positibo ang tubag sa mga PSAM Coordinators nga ipatuman ang maong mga prinsipyo sa social action alang sa us aka mahinungdanon nga pagpahigayon sa Alay Kapwa ngadto sa mga Pundok Banay. (Mga litrato ni Sr. Marissa, TDM)