GKK Servant Leaders andam na nga molusad ug Voters’ Ed

Gipangunahan sa Archdiocesan Social Action Center ang “Trainor’s Training on Political Education” ubos sa direksiyon ni Fr. Bong Dublan. Nahitabo kini niadtong Pebrero 20, tibuok adlaw sa 3rd Flr Pastoral bldg , St. Joseph the Worker Parish.

Ang maong kalihukan maoy unang hut-ong nga gihimo alang sa mga GKK Servant Leaders. Adunay kwarenta y kuatro (44) ka mga partisipante nga gikan sa kinse (15) ka mga parokya.

Ang usa sa mga tumong niini, aron mo-saka ang kaamguhan sa mga partisipante kabahin sa Pinili-ay sa Pilipinas, sa Politika ug pangagamhanan ilabina sa umaabot nga nasodnong Pinili-ay sa bulan sa Mayo.

Matud pa ni Susan Toreno usa ka PSA sa San Miguel Parish, Panacan, nga nagkanayon; dapat isip usa ka balaan ang boto gikinahanglan susihon ang tinuod nga pagkatawo, kinaiya ug personalidad sa kandidato ug may kapasidad nga motubag sa mga problema ug panginahanglan sa kinatibuk-ang nasud.

Dugang pa ni Bebie Batucan usa ka katekista/PSK sa St. Joseph the Worker nga ang maong seminar, nindot ang mga inputs nga gipasabot nila ni Fr. Bong Dublan ug ni Bro. Nonoy Rodriguez. Kini makapa-aghat sa mga botante sa pagpamalandong pag-ayo aron makapili sa tinuod, kinsa ang angayan mangulo sa Nasud ug masiguro gayud nga gikan sa kaugalingong pagbuot nga walay modiktar nga lain.

Sa laing bahin usab sa pulso sa usa ka partisipante sa St. Francis, Laverna, FLA Coordinator, Joseph Uy nagpadayag nga ang kinatibuk-ang kalihukan igo lang nagpahibalo sa umaabot nga eleksyon, apan walay hagit ug buhat. Matud pa ang pagbotar atong katungdanan, maayo unta ubanan sa pagtulun-an mahitungod sa Political Maturity, sa ingon matubag ang mga hiwi nga binuhatan ug adunay tinuod nga pagdumala ug maangkon ang mga kaayuhan alang sa tanan.

Bisan pa man, nahimong posible ang maong kalihukan, kasagaran puno sa kahimuot nga ang atong Simbahan aduna usab pagpanginlabot sa unahan alang sa pagpadayag sa gawasnong katungdanan sa pagpili, nga hapsay unta, kalinaw, kaangayan, panalanginan sa Dios.

Sa ikaduhang hut-ong sa pagtulun-an ipahigayon karong Pebrero 27, Sabado, sa San Pablo Parish, Matina, gipasibaw ni Cirila Roa, taga San Pablo, nga buot usab sila nga mosalmot sa poll watching ug voters’ assistance.

Kini tungod mipadayag ang uban sama ni Rudy Cugay sa St. Jude Parish, ga sigurado sila sa ilang boto apan wala silay salig sa makina nga pagagamiton sa pag-ihap sa mga boto.

Samtang buot nga ipadagan ni Rosalinda Jabonillo sa San Pedro Parish ang political education aron makab-ot ang limpiyo, makatarunganon nga piniliay. (Amie Desquitado, SJWP – SocCom)