24 Oras alang sa Ginoo

Niining Hubileyo sa Diosnong Kalooy, adunay gipahigayon nga kalihokan ang atong Simbahan sa umaabot nga Marso 4-5, 2016. Gitawag kini nga 24 Oras alang sa Ginoo. Gimando sa atong Santo Papa nga sa tanang simbahang lokal sa tibuok kalibutan saulogon ang 24 Oras alang sa Ginoo sa Biyernes ug Sabado sa dili apa ang ika 4 nga Dominggo sa Kwaresma.

Kinahanglan abli ang tanang simbahan alang sa katawhan nga buot mogahin og panahon sa pag-ampo ug pagsaulog sa mga sakramento sa Misa ug Pakig-uli. Ang mga Pari magmanggihatagaon og panahon alang sa Misa ug sa pagdawat sa pakompisal sa mga mahinulsulon ug ang pagpahamtang kanila sa kapasayloan sa mga sala sa ngalan sa Dios.

Kining maong kalihokan gipahigayon pagusab sa Simbahan alang sa hiniusang pagpahayag, sa pulong ug buhat, sa kinaiya ug misyon sa Simbahan alang sa kalibutan — ang pagpahayag sa Maayong Balita sa kaluwasan ug pakiguli alang sa tanan, ang pinadayag sa Diosnong Gugma ug Kalooy.

Gitinguha nga niining adlawa daghang mga kabatan-onan ang makakaplag pagusab sa dalan balik sa Ginoo. Mamahimo unta nga sentro sa kasaulogan ang Sakramento sa Pakig-uli aron sa ingon masinati sa tanan ang kadako ug kalapad sa kalooy sa Ginoo. Sa ilang mainitong pag-ampo makasinati sila pagusab og kalinaw sa ilang kasingkasing ug kalag.

Busa, duha ka importanteng balansayon ang himoon niining 24 Oras — ang 1. mapadayonong pagsimba sa Ginoo diha sa Eukaristiya ug ang 2. paghatag sa taas nga higayon sa pagsaulog sa Sakramento sa Pakig-uli. Dinhi sa atong diyosesis, gidasig, kon mahimo, nga sugdan ang 24 Oras sa alas tres sa hapon sa Biyernes hangtod sa alas tres sa hapon sa Sabado. Ang matag simbahan sa parokya ug oratoryo sa mga balay sa mga Relihiyoso, gidasig sa pagpahigayon niining 24 Oras uban sa ilang mga ginsakpan.

Bahin sa Sakramento sa Pakig-uli, labing importante nga masugdan ang pagpalambo sa pagsabot ug paghatag bili niining maong sakramento. Daghan ang naghunahuna pa gihapon nga kompisal ra ni. Busa, gidasig ko nga sa panahon sa 24 Oras alang sa Ginoo, ipahigayon ang katilingbanong pagsaulog sa Sakramento, makaduha sa 24 Oras. Niining katilingbanong pagsaulog makahatag og maayong katekesis bahin sa paghinulsol, pakig-uli sa Dios ug sa isigkatawo, pagpangayog pasaylo, ug labaw sa tanan, ang pagbag-o sa kinabuhi nga maoy lintunganay nga katuyuan sa Sakramento.

Alang sa kalampusan niining kalihokan, kinahanglan ang igong pagpahibalo sa katawhan niining kalihokan ginamit ang multimedia aron kahatagan sila sa higayon nga madungog ang pagdapit sa Dios kanila alang sa pakig-uli. Ang mga lideres sa Simbahan maoy unang mopahigayon ug moapil ug moduyog niining kalihokan agig dakong timaan sa KAHIUSAHAN sa Simbahan — mga konsagradong tawo, mga kaparian, mga magtotoong layko pinanguluhan sa atong Papa Francisco. Alang sa dugang kasayuran diha sa inyong dapit, pakisayod sa inyong opisina sa parokya.