Mausikon, matinumanon, sunod-sunod, mahigugmaon

Ikaupat nga Domingo sa Kwaresma
Jos. 5:9, 10-12/ Ps. 34:2-7/ 2 Cor. 5:17-21/ Lk. 15:1-3, 11-15

Dunay pinakamenos upat ka klase nga mga kinaiya ang gihulagway sa atong Ebanghelyo karon.

Una, ang mausikon nga anak. Kini ang nagrepresenta sa mga tawo human makadawat sa grasya sayon nga mowaldas niini sa mga kahilayan ug kaugalingong kalipay. Dali nilang usikan ang panalangin kay kaugalingon man lamang nila ang gitagbaw sa mga butang nga material ug kalibutanon. Sa higayon nga sila nahutdan na, diha pa sila nakaamgo sa kabuhong sa ilang kanhing kahimtang. Diha pa sila makahuna-huna unsa diay kabililhon ang kaayo kaniadto sa ilang nahimutangan.

Ikaduha, ang anak nga matinumanon nga nagmakanunayon sa pag-alagad sa iyang amahan. Siya ang nagrepresenta sa mga tawo nga makanunayong misimba ug mialagad sa Ginoo. Posible nga sila mao kadtong kanunay gilantaw sa kadaghanan nga maalagaron sa GKK o sa parokya. Apan sila ang mga tawo nga maningil sa balos sa ilang kaayo. Sila ang mga tawo nga dali mangwenta ilabi na kung ang nakasala nakadawat sa pasaylo. Sila ang tawo nga hinawayon sa mga mibalik na sa sabakan sa Dios.

Ikatulo, ang mga suloguon nga nagsunod-sunod lamang sa sugo sa ilang agalon ug walay alamag sa mga panghitabo sa palibot. Sila mahimong nagrepresenta sa mga tawo nga paanod-anod lamang ang desisyon. Sila ang mga tawo nga sakay-sakay lamang sa uso ug bul-og sa gamhanan ug walay sariling desisyon tungod sa ilang pagbati sa ilang utang kabubot-on o kaha kahadlok sa ilang kahimtang nga nagsalig lamang niadtong adunay may kwarta ug gahum.

Ikaupat, ang mahigugmaon ug mapasayluon nga Amahan. Siya ang nagrepresenta sa mga tawo nga adunay baruganan, nga dili matarug bisan pa man siya gibudhian. Sila ang tawo nga andam modawat ug kanunay musabot sa mga nag-usik sa ilang kinabuhi. Sila kadtong may baruganan nga maantigong modawat ni bisan kinsa nga adunay kahuyang.

Sayod ta nga kining ikaupat nga kinaiya nga mao ang mapasayluon ug mahigugmaon, nagpunting sa Dios Amahan nga kanunay nagdawat ug nanalangin kanato. Giampingan ba nato ang mga panalangin nga iyang gipiyal kanato? Niini ang upat ka mga kinaiya, unsa kaha nga klase kita nga pagkatawo?