Unsay angay kanato?

Ikatulo nga Domingo sa Kwaresma
Ex. 3:1-8a, 13-15/ 1 Cor. 10:1-6, 10-12/ Lk. 13:1-9

Niadtong nahiagum sa bagyong Pablo ang atong mga igsuon sa Davao Oriental ug sa ComVal, adunay miingon nga mao kadto ang angay nila kay nalimot na sila sa Dios. Sa dihang mibiktima sa daghang tawo ang bagyong Yolanda, dihay niingon, angay kadto alang kanila aron sila mobalik sa Dios. Tinuod ba nga ang mas makasasala angay nga mahiagum sa katalagman kaysa niadtong naluwas niini?

Sa susamang hitabo sa natumpagan sa tore diha sa Ebanghelyo, ang tubag ni Hesus mao nga dakung DILI! Gipapas ni Hesus ang panglantaw sa kadaghanan kanila nga ang katalagman mosakit niadtong mga mas makasasala. Alang kang Hesus, dili kini tinuod. Bisan kinsa mamahimong biktima sa katalagman. Ang atong Dios, Dios sa kaluoy sama sa nadungog nato sa unang pagbasa, diin ang Dios pinaagi kang Moises nagluwas sa iyang katawhan gikan sa mga Ehiptohanon nga nagpaantus kanila.

Kining maong pagluwas sa Dios gihinumduman diha sa ikaduhang pagbasa aron kinsa kadtong wala makapahimuot sa Dios, mobiya sa sala ug dili magbagulbol. Kini ang awhag sa ikaduhang bahin sa Ebanghelyo nga mao ang pagbag-o aron ang tawo makabunga ug dili putlon. Kinahanglan ang tawo kanunay abunohan sa mga pulong sa Dios, sa sakramento, sa mga pagtulon-an ug sa maayong buhat.

Kung dili tinuod nga ang mas makasasala maoy mabiktima sa mga katalagman, dili usab tinuod nga ang “masamang damo matagal mamatay”. Ang hagit mao nga bisan kinsa kanato gidapit sa paghinulsol niining panahon sa grasya sa Kwaresma. Ang tiunay nga paghinulsol ug pagbag-o gitukmod dili sa kahadlok sa silot, kondili sa pagsalig sa dakung gugma sa Dios. Ang iyang maatimanon nga gugma ug dili ang silot maoy giandam kanunay kanato. Ang iyang kaluoy ug dili ang paghukom maoy nagpaabot kanato. Busa pabungahon ta ang atong kaugalingon pinaagi sa pagbuhat sa maayo. Kay ang kaayo ug gugma sa Ginoo maoy angay kanato.