Ang Kwaresma ug Eukaristiya

Ang paghinulsol sa personal ug katilingbanong sala ug ang pagbalik sa dalan sa Dios pinaagi ni Kristo, maoy kinauyukang kahulugan ug tinguha natong tanan sa Simbahan karong Kwaresma. Kapatan ka adlaw nga panaw gikan sa kangitngit ug kabug-at sa sala padulong sa kaluwasan sa Pagkabanhaw diha ni Kristo. Pinaagi sa mga ritwal sa Kwaresma ug ilabi na sa Semana Santa, ang maong panaw atong gipaningkamutang masubay ug mapuy-an.

Alang sa katumanan niining gitinguha kinahanglan ang pipila ka kahimanan. Ang una mao ang pagpamati ug pagpatalinghug sa Pulong sa Dios niining panahon sa Kwaresma. Ang inadlawadlaw ug inanay nga pagpamati sa Pulong sa Dios subay sa talaan sa mga binasa matag adlaw nga gi-andam sa Simbahan (daily scripture guide) mapuslanon ug makahuluganon kaayo. Ang Pulong sa Dios adunay gitagana nga espesyal nga mensahe alang kanimo, tubag sa mga gipangandoy ug gipangita sa imong kasingkasing. Salig sa gahum sa Pulong sa Dios sa pagluwas kanato.

Ang ikaduha mao ang pag-apil sa Misa. Ang Pulong sa Dios diha sa Santos nga kasaulogan sa Eukaristiya mas makahuluganon ug gamhanan pa kaayo kay sa tinagsa ra o ordinaryong pagpamati sa Pulong. Dinhi ang Pulong sa Dios gisaulog. Diha sa Santos nga Misa, ang presensya sa Ginoo diha sa iyang Pulong nga gisangyaw, gilig-on pa ug gipakusgan pa pinaagi sa pagkaanaa sa mga kaigsoonan nga namati pud, sa Pari nga nangulo, ug labaw sa tanan sa tinuod nga pagkaanaa sa Ginoo diha sa iyang Lawas ug Dugo.

Mas makaayo ug makatabang, kutob sa mahimo, nga adlaw-adlaw kitang moapil sa pagmisa sa panahon sa Kwaresma, ug dili panagsa sa adlaw nga Dominggo matag semana. Sa ingon maanad ug mabaid ang atong galamhan sa pagdawat sa Pulong sa Dios nga mahimong usab nga atong Pulong sa Kinabuhi.

Ang ikatulo mao ang mapaubsanon ug mahinulsolon nga pagkalawat sa Ginoo diha sa Eukaristiya. Ang iyang Lawas nga gitugyan alang kanato ug ang iyang Dugo nga giula alang kanato, alang man sa kapasayloan sa atong mga sala. Pinaagi niini gipahiuli kita sa Amahan ngadto kaniya, pinaagi ni Kristo ug sa ministriya sa Simbahan. Dayag kaayo sa atong giampo sa dili pa kita mokalawat, “Ginoo dili ako angay nga mokalawat kanimo, apan ipamulong lamang ug mamaayo ako.”

Kon balikbalikon nato kining mahinulsulong pagkalawat, mas makaayo pa gayud kini. Mas mamaayo pa gayud kita, dili ba? Mao ni nga mapuslanaon kaayo ug makatabang sa atong panaw sa Kwaresma ang makanunayong pagkalawat, ilabi na kon matag adlaw. Dili kita madaot niini. Walay over dose. Grasyang makaluwas ang matagamtaman nato niini.