Ilocos Educational Tour

Bangui Wind Farm, Ilocos Norte (Photo by Julienne Mumar)

Ako si Magdalina P. Bautista nga taga GKK Sr. Santiago Chapel Zone 2, Arroyo Lanang. PSA Coordinator ako sa San Antonio Parish, Agdao, Davao City.

Ako usa sa 49 ka mga trabahante sa Our Lady of Fatima Academy Inc. nga nakauban sa gipatigayon nga Educational Tour didto sa Vigan, Ilocos Sur, Ilocos Norte, Baguio City, ug Manila di pa lamang dugay.

Nindot nga mga balay nga hinimo sa “bricks,” mga karaang simbahan nga lig-on kaayo diin luyo sa daghang mga bagyo wa gihapon nangatumpag ang akong naobserbahan.

Nangagi mi sa bantogang “Wind Mills” sa Ilocos; poste nga dagku, nagtuyok, nakapabugnaw sa lugar.

Daghan kong nakat-onan nga mga klase sa panginabuhi sa Vigan. Dihang nangagi mi sa usa ka himuanan ug asin, nahibaw-an nako nga 16 ka oras diay ang pagluto niini. Dili diay lalim ang ilang sakripisyo. Kugihan, utukan, sinsiro kaayo ang mga Ilocano.

Kini nakatabang sa ilang turismo hilabina na sa pagpalambo ug pag-uswag. Ug wala koy makita didto nga mga istambay. Tanan busy sa ilang panrabaho sama sa paghimo ug souvenirs, mats nga hinimo sa hilo, kalo, center table, bags, ahos, ug uban pa.

Lamian ang empanada nga pastel nga sinagulan ug gulay, itlog, karne, patatas, ug carrots. Limpyo ang pagkaluto. Gusto pud ko magluto dinhi sa Davao. Hinaut nga makapangita ug p’westo ug kapital.

Daku jud kaayo ang among kalipay kay naka-experience mi ug suroy-suroy sa nagkalain-laing lugar. Pasalamat mi kay sister Ma. Preciousa M. Rusiana, RVM ug sa among finance officer nga si Sister Divine Consejo G. Billanes, RVM tungod sa prebilihiyo sa pagsuroy-suroy namong mga personnel. – MAGDALINA, PSA COORDINATOR

Wow, pangandoy sab nakong maabot ang Vigan, a UNESCO World Heritage Site. More about it via http://itsmorefuninthephilippines.com/vigan/

‘til next kwentuhan higala! – Cheng