“Libreng Pustiso” Programa sa Sasa PSAM

Usa sa mga programa sa Sasa Parish Social Action – CARITAS nga gihatag alang sa mga Family beneficiaries niadtong bulan sa Deciembre mao ang pagtaod sa mga pustiso sa 50 ka mga tawo.

Malipayon ang mga nakadawat sa libreng pustiso nga nag-ngisi sa kalipay human mataod ang ilang bag-ong ngipon, bag-ong dagway niining bag-ong tuig. Matud pa ni Armand, “salamat kaayo nga adunay mga tawo nga maayong kasingkasing, nagpaambit sa ilang grasya nga naangkon, dugay na akong nangandoy nga mo smile nga dili maulaw.”

Luyo niini, gipasalamatan ang grupo sa Mindanao Dental Laboratories Association, Inc. pinaagi sa ilang president, Bro. Jess Saldana ug sa iyang mga kauban nga mga doctors ug laboratory personnel. Mao kini ilang pamaagi sa pagsaulog sa ilang ika 6th “Dental Mission, Libreng Pustiso.”

Ginahimo nila kini matag tuig sa lain–laing mga hut-ong sa nanginahanglan ug lugar.

Si Bro. Jess Saldana usab usa sa Pangulo sa Katilingban (PSK) sa San Lornezo Ruiz GKK niining maong parokya.

Sumala kay Beth Donasco incharge sa CARITAS nagpadayon sila sa pagpaningkamut nga makakita pa sila’g mga tawo nga adunay igong katakus sa paghatag og mga hinabang aron mahatag ngadto sa mga kaigsoonang kabus.

Giatiman karon ubos sa Kura Paroko, Fr. Dionisio Tabiliran, uban sa panghinaut ug pag-ampo nga panalanginan unta sa Ginoo nga may dugang pang suporta sa material ug spiritual, maangkon niining 140 ka pamilya isip beneficiaries sa PSAM. (Amie Desquitado | SJWP SoCCom)