(Cf. Kompendiyo sa Katekismo sa Simbahang Katoliko, 67-69)

           P: Unsa may tumong sa Dios sa pagmugna sa lalaki ug babaye?

T: Gimugna sa Dios ang tanan alang sa tawo, apan gibuhat sila aron pag-ila, pag-alagad ug paghigugma sa Dios, sa paghalad balik ngadto kaniya sa tanang mga binuhat dinhi niining kalibotan diha sa pagpasalamat ug aron sa pagbayaw kanila ngadto sa kinabuhi uban kaniya sa langit. Diha lamang sa misteryo sa Pulong Nahimong Tawo, ang misteryo sa tawhanong persona mahatagan ug tinuod nga katin-awan. Ang lalaki ug babaye gilaraw nang daan sa paghulagway sa larawan sa Anak sa Dios nga nahimong Tawo nga mao ang hingpit nga “larawan sa dili makita nga Dios” (Colosas 1:15).

            P: Ngano man nga ang kaliwatan sa tawo usa ra?

T: Tungod kay usa lamang ang gigikanan nila nga mao ang Dios, ang tanang tawo nahugpong sa kahiusahan sa tawhanong kaliwat. Gibuhat sa Dios ang tanang kanasoran sa mga tawo “gikan sa usa ka tawo” (Buhat 17:26). Ang tanan adunay usa lamang ka Manluluwas ug gitawag pag-ambit sa walay kataposan nga kalipay sa Dios.

            P: Sa unsa mang paagiha nga ang kalag ug ang lawas nagkahiusa diha sa tawo?

            T:Ang tawhanong persona usa ka linalang nga sa samang higayon lawasnon ug epirituhanon. Diha sa tawo ang espiritu ug ang materya nahugpong sa usa ka ninaiya. Kining panaghiusa halawom kayo, gumikan sa espirituhanong sukaranan nga mao ang kalag, ang lawas nga mao ang materya, nahimong buhing tawhanong lawas nga miambit diha sa katakos sa larawan sa Dios.