Nabunyagan na unta apan wala nagasimba

Sa miaging semana, diin usa ako sa linibo ka mga magtotoo nga nakaapil sa 51st International Eucharistic Congress 2016 gikan sa lainlain dapit sa kalibutan, nagmalipayon, nadasig, nahibulong ug nagmapasalamaton kami pagusab sa dako kaayong gasa sa Misteryo sa Yukaristiya – si Hesukristo nga gilansang sa krus ug nabanhaw. Siya si Hesukristo nga diha na sa matag usa ka nabunyagan. Siya, nga mao lamang ang paglaum sa himaya. (1 Kol. 1:27).

Ang may kasayuran, kaamguhan, kamatngonan, ug kasinatian sa Misteryo sa Yukaristiya madasig ug matandog gayud nga moapil sa pagsaulog, sa pagsimba, ug pagsaksi ug pagasangyaw niini sa tanan. Mao kini ang nahitabo ug mahitabo sa kapin 10 ka libo nga partisipante sa maong kongreso. Mamahimo kaming madasigong misyonerong disipulo ni Kristo – Yukaristiya sa tibuok kalibutan.

Hangtod karon, maayo kaayo nga kabahin pa sa “agenda” sa mga ginikanan, bisan unsa pa ang ilang kahimtang – minyo o single, kasado o mansibado, sa kahamugaway o kapit-os, ang pagpabunyag sa ialang mga gagmayng bata o mga bata nga may buot na. Tinguha nilang tanan nga mabendisyonan ang ilang mga anak ug mahimong kabahin sa Simbahan nga ilang namat-an og kahayag. Kining kahimtang, angay nga ikalipay ug ikapasalamat sa Simbahan. Kaakuhan sa Simbahan nga tabangan ug ipahigayon pag-ayo ang katumanan sa maayong tinguha sa mga ginikanan. Dili unta babagan ug ihikaw kanila ang pagdawat sa unang Sakramento sa kaluwasan.

Niining Tuig sa Pamilya ug Yukaristiya, angayan natong tan-awon usab ang nagakahitabo labot sa atong pagpabunyag. Angayan usab natong tan-awon susihon nganong ang pagpabunyag sa makadaghan wala modagayday ngadto sa pagsimba ug pag-apil sa pagmisa. Dili nato ikalimod ug ikatago nga kapin sa katunga sa mga nagapabunyag ug nabunyagan ang wala nagadako sa panuigon nga makanunayong mosimba ug magmisa.

Kung kita ang pangutan-on, kasayang sa mga panalangin nga nahikaw sa kadaghanan nga mga magtotoo. Kasayang nga panagsa lamang nila madawat ang kalan-on gikan sa langit nga tuburan sa kaluwasan. Kasayang nga dili sila makakawos sa tubod sa buhing tubig nga magtagbaw sa kauhaw ug kagutom sa tawo. Kadakong sayop nga nagmantinir lamang sila sa mga ilimnon ug kalan-on nga maghatag lamang og lumalabay nga kabusog. Unsa pud kaha ang ilang gihunahuna ug gibati bahin niini?

Kung ato usab tan-awon ang paagi sa Simbahan sa pagtabang sa mga ginikanan sa pagpangandam alang sa pagpabunyag sa ilang mga anak, makaingon dayon kita nga dili igo nga masaulog lamang ang Bunyag.

Dayag kaayo nga kinahanglan bag-ohon ang programa nato sa Pre-bap ug sa Post-bap. Kinahanglan nga han-ayon ang inanay nga pagmatuto sa magpabunyag ug sa gibunyagan sulod sa pipila ka katuigan hangtod sa ilang Pagkompirma. Sa Ato pa, gikan sa pagpanganak hangtod sa 15-16 anyos. Apil sa maong han-ay nga pamaagi ang mga ginikanan, mga anak. Ug lain pang sakop sa pamilya, ug ang mga katekista ug miembro sa Kristohanong katilingban.

Panahon na, nga tagaan ang katumanan ang gisugyot nga subayon ang paagi sa “katekumenado” dili lang alang sa mga hamtong, apan alang usab sa mga kabataan. Kinsa ug asa ug kanus-a kaha nga makapahigayon niining “katekumenadong” paagi sa Pre-bap ug Post-bap.