‘Pagsaulog’ Sa Siyudad Sa Mati 2016 – Viva Señor Sto. Niño!

Ang siyudad sa Mati nagpasidungog kang Sr. Sto. Niño pinaagi sa tinuig nga ‘Pagsaulog’ matag bulan sa Enero, dungan usab sa Sinulog, Pit Sinyor! sa Sugbo niadtong Enero 17, 2016. Gisugdan ang maong kalihokan sa kasaulogan sa Stos. nga Misa alas 10:00 sa buntag sa San Nicolas de Tolentino Cathedral sa pagpanguna ni Apostolic Administrator ug kura paroko Fr. Edito S. Baño, ug pagkahuman sa Misa gipanalanginan ang mga bata ug ang managlahing mga rebulto sa Sto. Niño nga gibutang atubangan sa altar. Sa alas 2:00 sa hapon mao ang procession ug parade nga nagsugod sa Mati Park and Baywalk Park, kon diin ang katawhan apil na ang mga kamadrehan sa Carmelite Missionaries (CM) ug Missionaries of the Immaculate Conception (MIC), nilakaw hangtud sa Mati Socio-Cultural Center nga mao ang bag-ong venue alang sa Pagsaulog 2016. Unya ang mga imahen ni Sr. Santo Niño nga adunay nagkalain-laing porma ug kolor sa senina ang gibutang sa atubangan sa stage, ug dayon namatikdan diha sa solemneng pagtahod sa mga tawo nga kining selebrasyon dili lang usa ka ordinaryong kalihukan kondili masinati gyod ang balaang presenya sa Dios diha sa iyang mahal nga anak nga si Niño Jesus.

Gisunod dayon ang Praise and Worship with Showcase of Talents. Gipasabot sab ni emcee Al James Aguilon nga ang Pagsaulog nagsugod sa tuig 2011 sa hugot nga pagtaguyod sa pamilyang Almario “with roots and origins” sa Cebu City. Mao nga ang selebrasyon nahisama sa Sinulog sa Cebu. Bisan dili kini dako nga selebrasyon sa siyudad sa Mati apan gitinguha nga ang tumong makab-ot nga mao ang ABC. Ang A nagkahulogan ug ACCLAIM, pagdayeg sa Dios, B nagkahulogan og BELIEVE, ug ang C nagkahulogan ug CHRIST-CENTERED. Nindot kaayo ang selebrasyon kay ang mga katawhan gidala diha sa pagtan-aw nga si Kristo mao ang sentro sa ilang kinabuhi ug wala nay lain. Nagpa-ambit usab ang emcee, nga tulo ka tuig nga milabay, ang siyudad sa Mati nakasinati og usa ka milagro. Dihang gibalita nga moabot ang Bagyong Agaton, nag-ulan og kusog apan sa pagsugod sa parade mihayag ang langit. Di ba usa kini ka milagro? Ug pulong na pod sa emcee nga karong tuiga aduna na poy dakong milagro nga nahitabo sa Mati kay ang una nga misulod sa Semi-Finals sa Tawag ng Tanghalan sa Showtime, taga-Mati man nga mao si Dominador Alviola. Usa kini ka dakong garbo ug inspirasyon alang sa mga taga Mati. Ug tinuod nadungog gyod sa tanan ang manindot nga tingog ni Dominador.

Ang nakahatag sab og kanindot sa Pagsaulog mao ang nagkalain-laing pasundayag sa mga bata ug kabatan-onan nga gi-apilan sa mga estudyante sa Mati School of Arts and Trade, National Science High School, Matiao National High School, Holy Infant community, Mati National Comprehensive High School, Rocamora Elementary School, ug Choral presentation sa State College (DOSCST). Gisunod dayon ang pagbendisyon ni Fr. Edito S. Baño sa mga imahen ug mga katawhan. Gipamalik ang mga imahen ug bitbit ang ilang Sto. Niño, ang tanan nanayaw sa ritmo sa mga tambol. Ug gihuman kini sa healing ug bendisyon sa pari. Alang sa mga taga Mati, PIT SENYOR SA MATI KINI!