Si Hesus Nazareno sa San Pedro

Ilado ang QUIAPO church tungod kang Hesus Nazareno. Dinhi sa Dabaw, usa ka sugilanon ang akong nadunggan gikan sa usa ka devotee niya nga si Mila Gill gikan sa Holy Family GKK, sa Parokya sa San Pablo, Matina, Davao City. Isip usa sa mga apo, siya karon ang lumilihok diha sa San Pedro Cathedral aron mapadayon ang novena, prusisyon ug pista sa Nazareno.

Dear KNOT, Nagsugod ang debosyon sa akong pamilya sa Hesus Nazareno niadtong tuig 1936. Ang icon nga gikan pa sa Espanya gihatag ni Capili sa akong iyaan. Ug sukad niadto, di na kumpleto ang Biyernes Santo kung di namo sya maprusisyon. Apil siya pirmi sa aktibidad sa pamilya ug mga kahigalaan. Apan niabot ang panahon nga wa na kini mahatagan ug igong pagtagad. Ang icon naistambay sa among balay sa Matina sukad 1990s. Apan ang akong inahan nga nagapanahi sa iyahang sanina, gipadamgo. Usa ka Nazareno gutaygutay ang sapot. Busa, nakapamalandong ang pamilya nga gusto na ni Hesus nga atimanon siya pagbalik. Busa sa panabang sa kura paroko nga si Msgr. Nards Vicente, nihangyo ang akong pamilya nga ibalik ang debosyon sa Itom nga Nazareno sa San Pedro Cathedral niadtong tuig 2012. Human maaprobahan, gibalik ang icon sa simbahan ug gisugdan ang novena kada Biyernes, 5:30 sa hapon. Nagpadayon ug pagampo ang pamilya hangtud sa usa ka milagro ang nahitabo. Adunay deboto ni Nazareno ang nag pilgrimage sa mga parokya sa Dabaw ug natunong ang ilang pamisa diha sa Cathedral. Senyas kadto nga anaa pay musunod nga ibalik. Ug tuod man, sa parish meeting nga gisalmutan ni Abp. Valles, mihangyo na pud ang akong pamilya nga ibalik ang Nazareno diha sa Biyernes Santo nga prusisyon. Maayo ang Diyos, niadtong GOOD FRIDAY, tuig 2015, siya miuban sa pagtuyok. Nahitabo napud ang prusisyon sama joining na salarawan. Nalipay ko. Nakahilak pagkadungog nako. Salamat sa Diyos! Salamat Hesus! – Mila Gill