Ang Pag-ampo sa Kahiusahan sa mga Kristiyanos

Tingali daghan kanatong Katoliko, uban sa mga laing Kristiyanos, wala mahibalo nga dunay tinuig nga hiniusang pag-ampo alang sa kahiusahan sa tanang mga Kristiyanos. Ginahimo kini sa bulan sa Enero, sa semana nga ginasaulog ang kapistahan sa pagbag-o ni San Pablo – Marso 25. Busa sa Enero 18-25 maoy semana sa maong hiniusang pag-ampo sa mga Kristiyanong simbahan alang sa kahiusahan, subay sa mando ug pag-ampo ni Jesus sa katapusang panihapon (Jn 17:21).

Gikauyunan nga ang tema karong tuig mao: “Gitawag sa pagsangyaw sa mga gamhanang buhat sa Dios” (1 Ped. 2:9)

Kabahin sa kasaysayan sa mga sumusunod ni Kristo nga naglangkob sa Simbahan nga gitukod ni Kristo sa gahum sa Spirito Santo (Pentekostes), ang pagkabahinbahin ngadto sa lainlain simbahan ug mga rito. Ang pag-ampo ni Jesus sa kahiusahan sa iyang mga sumusunod, niadtong katapusang panihapon, nagpasidaan na sa umaabot nga panagbulag, ug sa iyang panghinaot nga mahiusa gayud sila. Apan nahitabo ra gayud ang gipasidaan ug nakapahuyang kini sa Simbakhan ug naghatag iskandalo sa kalibutan.

Ang giampo ug gitinguha kaniadto, hangtud karon dili ang panagsama, kon dili, bisan pa sa panaglahi, nahiusa gihapon sama sa kahiusahan sa Santissima Trinidad. Ang kahiusahan diha sa Dios – uban sa pagtoo ug gugma.

Paglabay sa taas nga panahon ug human sa daghan usab nga sayop ug sala sa matag usa, hinayhinay, nagkaduol og balik ang mga nagkabulag. Wala na kaayo nanag-away, dinaotay, inilugay og mga sakop. Nagapatigbabaw ang pagtinahuray, pagdawat sa usag-usa ug gitagaan og pagtagad kadtong mga butang nga makaayo ug makahiusa. Dili pa hingpit. Duna pay husayon ug palamboon. Apan, salamat sa Dios, padulong na kita didto.

Busa, mahinungdanon kaayo kining hiniusang pagampo, ilabi na diha sa lokal nga kahimtang diin nanaglambigitay ang lainlaing Kristiyano. Hinaot unta nga kining tinuig nga hiniusang pag-ampo magdasig kanatong tanang sumusunod ni Kristo, pinanguluhan sa mga pastor, mga pari og Obispo, inabagn sa mga laykong lider ug mga relihiyoso, nga magpadayon nga maglambigitay sa usag-usa aron mousbaw pa ang pagsinabtanay ug pagtinabangay, subay sa gimando ug giampo ni Jesus. Mahimo unta kining hiniusang pag-ampo nga usa sa mga tulay sa panagdait ug kalinaw tali kantong tanang Kristohanon.

Kon dili nato mapahigayon kining kalihukan karong semanaha, gitugutan kita nga ibalhin kini sa laing bulan sulod niining tuig. Busa, dinhi sa atong diyosesis ato kining himoon sugod sa Dominggo sa Santissima Trinidad sa Mayo 15 hangtod Mayo 21. Sa ingon niini, aduna pa kitay igong panahon sa pagtagad ug pagpangandam niini arin daghan ang mahibalo ug madasig sa pag-apil.

Ang Simbahan usa ka dakong pamilya. Dunay lainlaing bahin, lainlaing pagpangalagad, apan usa ra gihapon tungod sa Ginoo nga usa ra. Ang kausahan natong mga sumusunod ni Kristo maoy pinaka dakong bahin sa atong kasantos. Katoohan lamang kita sa kalibutan kon makita ug masinati nila kining kahiusahan uban kanato.