Harmony Walk mag-tak-op sa Harmony Week

Usa ka Harmony Walk ang ipahigayon gikan sa People’s Park isip pagtak-op sa usa ka semana nga pagsaulog sa Interfaith Harmony Week sa petsa 7 sa Pebrero, alas 4 hangtod alas 6 sa hapon.

Pagatambongan kini sa mga sakop sa nagkalain-laing mga relihiyon ug sekta sa Dakbayan sa Dabaw kansang tumong mao ang pagkab-ot sa usa ka malinawon nga pagkigdiyalogo.

Ang Interfaith Harmony week nga gi organisa sa nagkalain-lain nga religious group sa Davao City gipahigayon sugod Pebrero 1 sa tema nga “Mercy wellspring of Peace and Hope.”

Bisan sa gamay nga adlaw sa prepasrasyon, kini nahimo gihapon nga posible tungod sa aktibong kooperasyon sa religious sector.

Gibuksan ang Harmony Week niadtong Pebrero 1 sa Ateneo De Davao University diin adunay interfaith prayer sa alas 3:40 hangtod alas 5:40 sa hapon ug gisundan sa usa ka Harmony meal.

Sa ikaduhang adlaw, Pebrero 4 sa alas 2:00 hangtod alas 5:00 sa hapon, gipahigayon ang Interfaith forum on Harmony sa Bishop-Ulama Conference room.

Sa ikatulong adlaw, Pebrero 5, alas 9:00 sa buntag gitakda ang Poster Making sa Naval Station Felix Apolinario, Panacan. Ug pagka Pebrero 6 adunay nagkalain laing mga kalihukan lakip na ang Santos nga Misa sa paglusad sa World Interfaith Harmony Week gikan sa alas 8:00 sa buntag hangtod alas 5:00pm. (Renzy Julls Quirog)