Ang Pagpangaon

Sa katapusan sa 2016 International Eucharistic Congress, didto sa katapusang kasaulogan sa Misa, diin mga usa ka milyong mga Katoliko ang misalmot, nasinati ug nakita ang 3 ka tema nga balikbalik nga gipamalandungan, gipamatud-an, gipasalamatan — ang pagpangaon, ang pagsakripisyo, ang tinuod nga pagkaanaa ni Kristo sa Yukaristiya.

Buntag pa lang nagsugod na og tapok ug paglakaw ang mga partisipantes padulong sa dapit diin moapil sa bangkite sa Ginoo, wala pay labot ang mga boluntaryo. Sa pagkahapon na, ubos sa kainit sa adlaw, namaktas pa gihapon ang kadaghanan sa mga tawo — mga tigulang, hamong, mga bata. Daghan pud kinugos pa ang mga gagmayng bata.

Pastilan! Sobra pa kini sa kakugi sa debosyon. Kay usa ra man gayud ang tuyo sa pagtapok, nga moambit sa Misa, sa pagpangaon sa Yukaristiya, sa pagkalawat sa Ginoo. Ug gipangandaman gayud pag-ayo ang han-ay sa pagpakalawat sa mga tawo.

Dayag ang diwa sa pagtahud sa usag-usa bisan sa panaglahi. Dayag ang kalipay ug kadasig sa nga nangapil gikan sa sinugdan hangtod sa katapusan. Dayag ang diwa sa pakiglambigit. Dayag ang tinguha sa pagpangalagad. Dayag ang paginambitay ug pagtinabangay. Dayag ang diwa sa panagdait. Dayag ang diwa sa kahiusahan.

Ang Pagsakripisyo
Alang sa 7 ka adlaw sa kongreso nagkinahanglan og dili moubos sa 5000 nga mga boluntaryo mangalagad alang sa nagkalain laing buluhaton, ilabi na sa pinakadako nga kalihikan — ang katapusang Misa. Apan ang mga Sugnoanon usab nagsakripisyo tungod sa bagang trapik ug mga dalan nga gisarado. Ang mga misalmot sa Misa nagsakripisyo usab og lakaw, hulat, init, alang sa higayon lamang nga makaapil sa Misa.

2000 ka mga choir members ang nangandam nangulo sa pagawit sa maong misa, gikan sa lain-laing parokya sa Arsidiyosesis sa Cebu — bata, hamtong ug edaran, apil. Dili lalim ang pagpahigayon niini.

Ang mga pwersa sa LGU nagmakugihon usab nga midugang ug mitabang sa pagpahiluna sa han-ay sa selebrasyon. Kon wala sila, dako kaayo ang kalainan ug kakulangan. Sa politika, bulag ang Simbahan ug Estado. Apan sa kaayuhan sa mga tawo kinahanglan magkahiusa sila.

Kining tanang nasaksihan nga pagsakripisyo sa lainlain hut-ong sa mga tawo alang niining kalihokan masabtan lamang ug pasalamatan kay nasayod kita nga ang Dios man, pinaagi sa iyang pinalanggang Anak nga si HesuKristo ang unang nagsakripisyo — namatay, nabanhaw, ug kanunay nagauban kanato, hangtod sa katapusan sa panahon. Dalaygon ang Dios, hangtod sa kahangtoran.

Ang tinuod nga pagkaanaa ni Kristo
Usa ka milyon nga mga nagkalainlaing mga tawo nagtigom, nagsakripisyo, namati sa Pulong sa Dios, nagsimba ug nagpasalamat, naginambitay sa bunga sa yuta ug ginama sa kamot sa tawo, ug nangaon sa Pan sa Kinabuhi nga gikan sa langit, Ang Pan sa mga kaanghelan. Ang Pan sa kinabuhing dayon.

Mao gayud kini ang atong gitoohan, ug maoy lintunganay nga hinungdan sa panagtigom, sa matag panagtigom sa Simbahan. Sa maong higayon gipadayag ug nasinati ang kinauyukang kinaiya sa tibuok Simbahan diha ni Kristo — Usa, Santo, Katoliko, ug Apostolikong Simbahan, sa langit ug sa yuta.

Matud pa ni Cardinal Bo, sa among pagapil sa Kongreso, ang tanan gibati ang dakong garbo ug kaliapay sa pagkakatoliko taliwala sa daghan mga hagit ug kabug-at sa pagbansay sa pagtoo karon.

Human sa talagsaong kasinatian, unsa namay sunod? Atangi ang sunod nga bahin niining pamalandong sa sunod semana.