Apostolado sa Bibliya hain ka naman karon?

Niining bulan sa Enero, saulugon na usab sa Simbahan sa Pilipinas ang National Bible Week Enero 18-24. Gipasiugdahan kini niadto pang dekada sitenta sa Episcopal Commission sa Biblical Apostolate. Dinhi sa Diyosesis sa Digos gipahigayon kini sa atong Diocesan Biblical Apostolate ubos sa Diocesan Catechetical and Formation Center.

Gitumong niining apostolado nga ang mga Katoliko, makaila sa Bibliya, mobasa sa Bibliya, puy-an sa kinabuhi ang Bibliya, ug ipaambit ang Bibliya ngadto sa uban.

Sa ato pa, pinaagi sa maong apostolado, ang katawhan mahatagan og higayon nga maila si Kristo, mabag-o diha ni Kristo, ug ngadto-ngadto, magmisyon uban ni Kristo.

Human sa upat na ka dekada, kumusta naman ang kahimtang sa maong apostolado sa atong mga parokya? Naa pa bay daghan nga nagatampo sa ilang talento, panahon ug katigayunan alang niining mahinungdanon nga bahin sa pagumol sa kristohanong pagtoo ug kinabuhi? Sa ingon niini, nagapadayon pa ba ang pagpahigayon sa mga seminar sa BBS ug BBS Phase 2? Mao kini ang labing unang pagkat-on bahin sa Bibliya alang sa atong mga yanong katoliko ug labing importanteng pagsugod.

Ang usa sa sukdanan sa kalampusan sa Apostolado sa Bibliya mao nga nagbunga kini sa pagorganisa og mga Bible sharing groups nga makanunayong nagabasa,namalandong ug nagaampo sa Pulong sa Dios, ug naningkamot nga tumanon ang Pulong sa Dios diha sa ilang adlawadlaw nga kinabuhi. Busa, ang Pulong sa Dios mahimong Pulong sa Kinabuhi.

Ang maong bible sharing ginahimo sa pamilya, sa mga cluster sa GKK, sa mga grupo sa opisina, mga household sa mga movements, mga “clubs” sa eskwelahan, mga lainlaing selda sa bilangguan, ug uban pang mga pundok diha sa parokya. Ang Pulong sa Dios mamahimo gayud alang kanila nga iwag ug lamdag sa ilang panaw sa kinabuhi ug panginabuhi. Aron makatabang sa pagmonitor ug pagdumala sa mga bible sharing groups, ang parokya maghimo og Parish Bible Sharing Board diin nahimutang ang ngalan, Gkk, parokya, pila ka buok, unsang adlaw naga sharing, ug uban pang impormasyon nga makatabang.

Ang gamay nga libreto nga nagkauluhan “KAUBAN SA KRISTOHANONG PAMILYA” mamahimong giya alang sa bible sharing sa mga nagkalainlaing pundok. Makuha kini diha sa opisina sa inyong parokya.

Usahay, mahitabo nga kitang mga Katoliko madani sa bible sharing o bible study sa laing simbahan o sekta. Dili man kini dautan ni sala. Apan, gipahimangnoan ko kamo nga likayan kini kay lahi sila kay sa ato sa pagsabot ug paghubad sa Bibliya. Busa, makalibog kini ug usuhay malihis unya kamo sa gikan sa kamatuoran ug madasig sa pagbiya sa inyong pagkakatoliko ug mobalhin sa laing simbahan. Akong nasayran nga sa makadaghan mahitabo kini kay walay gipahigayon ang Katolikong parokya og bible sharing o bible study. Dako kining kakulangan ug tulubagon sa mga nagdumala sa parokya.

Aron mapakaylap pa ang pagtuon bahin sa Bibliya diha sa parokya, nagpadayon pa ba gihapon ang pagpahigayon sa BBS Facilitators’ training? Sa ingon niini anaay igong mga lumilihok ug mga facilitaors alang niining mga seminar. Sumpay niining Facilitators’ training, nagkinahanglan usab ang mapadayonong Bible Study alang sa mga Facilitators. Kasagaran ang mga Pari ang dunay katakus nga makagiya niining Bible Study tungod sa ilang taas nga pagtuon sa Balang Kasulatan didto sa Seminaryo.

Niadtong tuig 2012, si Papa Benedikto XVI nagpagula sa iyang pamahayag bahin sa “Pulong sa Ginoo diha sa misyon sa Simbahan” (Verbum Domini). Ang pagpalanog niadtong iyang pamahayag diha sa atong mga GKK ug mga organisasyon ug movements sa Simbahan makatabang sa dugang katin-awan ug kadasig niadtong nagalihok sa Apostolado sa Bibliya.

Manghinaot ako, nga niining kasaulogan karong tuiga sa Bible Week mag-aghat kanatong tanan sa pagpahigmata ug pagdasig sa maong apostolado diha sa atong mga parokya. Mahimo untang dakong bahin ang atong mga Kaparian sa paghigmata ug pagpabangon sa nagkahinay, nagkatulog, o nagkaluya nga Apostolado sa Bibliya.