Pundok Banay: Gasa sa Mindanao

Ang akong kasinatian kabahin sa ikatulong panagtigum sa Basic Ecclesial Communities (BEC) conference sa Arkidayosis sa Manila usa ka maanindot nga kabahin gyud sa akong kinabuhi isip laykong nagaalagad diha sa katawhan sa Dios.

Matawag nako kini og dili ordinaryo, tungod kini nahitabo “beyond my expectation”, ingon “expect the unexpected.” Tungod sa nasudnong panagtigum nakita nako nga unsa kalapad ug kalayo kung ikumpara ang BEC sa Mindanao sa Visayas ug Luzon.

Maanindut nga pahiyon, adunay duha ka babaye nga misugat kanamo pag abot sa Manila. Sarang managkaila na sa dugay’ng panahon ug nakita pag-usab. Sa wala namo damha, silang duha kabalo mo bisaya. Nangita dayon kami og kan-anan aron maniudto kay nakaabot man kami didto nga tingpaninudto na. Sa dihang nakaabot na kami ngadto sa foster parish namo sa Our Lady of the Abandoned (POLA), lamiang pagkaon ang ilang gipaambit namo.

Sa pagkolokabildo kanila, didto among nahibaloan nga ang ilang parokya minandoan og Mission Society of the Philippines (MSP) nga mga pari. Ang ilang parochial vicar ang miabiabi kanamo ug natingala mi nga kabalo pud siya mobisaya. Taga Agusan diay kini. Hangtod nga gikuha na kami sa among mga foster families.

Ang akong foster parent nga si Ate Grace biyuda ug adunay tulo ka anak, apan ang iyang duha ka anak anaa sa langyaw’ng nasud, ug aduna siyay tulo ka kauban sa balay, mga igsuon sa iyang bana, katabang, ug duha ka iro. Maayo sila nga pamilya ug sa unang higayon usab sila nakasinati nga adunay mipuyo kanila.

Adunay usa ka adlaw nga nabiyaan ako sa among sakyanan ug mitawag kanako ang among in-charge nga magcommute nalang ako. Nangutana ako kang Ate Grace kung unsaon pag-adto sa Paco Catholic School, kay didto man ang venue sa panagtigum. Ingon niya nga ihatod lang niya ako tungod kabalo siya kung asa ang maong tulunghaan; alumna siya ngadto.

Ang katilingban/parokya sa POLA, adunay pito ka kapilya nga gitawag nila og sub-parish. Ako nahimutang sa Sacred Heart sub-parish ug ang akong foster parent nga mao ang usa sa mga coordinators sa Munting Pamayanang Simbahan (MPS). Ang MPS sa ato mao ang “Pundok Banay.” Usa sa ilang best practices mao ang “Sambahaginan” diin ang matag usa adunay katungod nga mopaambit sa iyang kasinatian diha sa Ebanghelyo nga gibasa o sa iyang kaugalingon. Kung sa ato pa kini, mao ang “Household” o “Bible Sharing,” dili kini bag-o kanako apan ngadto akong nasinati pag-usab kining mga butanga. Gasa gayud ang BEC sa Mindanao!

Sa maong panagtigum, mikabat kami og dul-an, usa ka libo ug tulo ka gatos ka mga partisipante gikan sa kapitoag lima ka mga diyosesis ug arkidayosis sa nasud. Ang unang namulong (speaker) mao si Orlando Cardinal Quevedo (BECs in the Philippines – Thanksgiving for 50 Years of Vatican II’s Spirit of Renewal). Niining bahina akong mas nasabtan nga kung wala ang Vatican II, wala pud ang GKK, tungod usa man ang GKK sa nahimong prutas sa maong kausaban.

Ikaduhang namulong mao si Luis Antonio Cardinal Tagle (BEC in the Philippines: Responding as a Community of Missionary Disciples to the Challenge of Pope Francis to be a Poor Church for the Poor). Apan sa wala nako damha, wala akoy nasulat tungod sa pagpaminaw kaniya. Lahi ra kaayo ang “aura” ni Cardinal Chito. Nindot kaayong paminaw sa iyang mga ginasulti.

Sa ikaupat nga gabii, adunay “socialization” nga nahitabo. Nagkadaiyang pasundayag gikan sa mga piniling parokya ug tulunghaan ang misalmot.Sa katapusang adlaw sa panagtapok, miadto kami sa Cuneta Astrodome alang sa pagtapos sa maong panagtigum. Didto adunay mga sayaw, kanta, mga artista sama nila Jamie Rivera, Candy Pangilinan, ug Jimmy Bondoc. Aduna usab nagpaambit sa ilang mga kasinatian sa panagtapok, layko, pari ug madre. Gihuman kini pinaagi sa Santos nga Misa nga pinangunahan ni Cardinal Tagle, ug ngadto usab gipaila ni Bishop Rimando ang muhulip kaniya isip CBCP-BEC Chairman.

Kini nga kasinatian, dili nako malimtan ug nahimo nako kining talagsaong bahandi sa akong kinabuhi. Mapasalamaton ako sa akong mga kaubanan sa GKK-PSK nga akong nahimong usa sa mga morepresentar sa Arkidayosis sa Davao, ilabina sa among Kura Paruko nga misuporta pinansyal kanako. (Gary Guivencan, SAP SoCCom)