Ang Pagbunyag sa Ginoo Katumanan sa atong Kaluwasan

Is. 42:1-4, 6-7/Ps. 29/Buhat 10:34-38/Lk. 3: 15-16, 21-22 or Is. 40:1-5, 9-11/Ps. 104/Tito 2:11-14; 3:4-7

Sumala sa Kasulatan, ilabina sa Ebanghelyo ni San Mateo, ang bunyag ni Hesus usa ka importante ug mahinungdanon nga panghitabo. Ug atong sumadahon pag-ayo ang bunyag ni Hesus, makaingon gayod kita nga “swerte kaayo kitang tanan isip mga Kristiyanos”, kay gibuhat gayud ni Kristo ang kabubut-on sa Ginoo nga maoy nagplano nga maluwas kitang tanan. Ang kaluwasan kanatong tanan nagasukad sa pagpa-ubos sa atong Ginoo pinaagi sa iyang pagkatawo diha ni Kristo. Busa si Kristo mahimong maayong ehemplo ug maayong modelo kanatong tanang mga Katoliko. Ang bunyag ni Kristo mao ang “tataw ug dayag” nga pagpa-ubos sa atong Ginoo. Gani, mabasa nato sa Kasulatan nga si Hesus mismo ang miduol ngadto kang Juan nga Magbubunyag aron siya magpabunyag. Usa kini kahigayon nga angay kitang makakat-on sa pagpa-ubos sa atong kaugalingon. Sa panahon nga gibunyagan si Hesus, si Juan nagdumili sa pagbunyag kaniya kay na bati niya nga dili siya takus nga mobunyag kaniya ug siya miingon: “Ako ang angay nga magpabunyag kanimo ug karon magpabunyag ka kanako?” Pero si Hesus namugos ni Juan nga siya bunyagan ug miingon siya “Buhata dinhi kanako karon kay mao kini ang maayong higayon nga makab-ot nato ang tanang kaayohan ug kaluwasan. Sa pagka-human niini, adunay tingog gikan sa langit nga nag-ingon: “mao kini ang akong Anak nga nakapahimuot kanako.” Kini nga nagpasabot nga ang atong Langit nong Amahan na kaila ug nagpamatuod nga si Hesus Iyang gipadala kanato… Tungod niini, maka-ingon gayod kita nga ang bunyag ni Hesus dili ordinaryo nga bunyag sama sa atong bunyag karon. Matud pa, ang Iyang bunyag dili usa kabunyag sa paghinulsol ug pagpasaylo sa mga sala kay wala man gayud siyay sala ug nagatoo kita niini isip mga binunyagan. Pero ang iyang bunyag usa kahigayon sa katumanan ug usa ka kasiguroan nga kitang tanan makaangkon sa kaluwasan. Si Hesus mitahan sa iyang kaugalingon alang sa atong kaugalingong kaluwasan. Ang bunyag, ato kining gi-isip nga espesyal nga higayon aron kitang tanan mahugasan sa atong mga kasal-anan. Mao kini ang tinuod nga panghitabo nga usa ka tawo mamahimong tinuod ug limpyong anak sa Ginoo.

Matud pa, ang atong Langitnong Amahan nalipay pag-ayo sa iyang anak nga mipa-ubos sa iyang kaugalingon pinaagi sa pagpabunyag sa ubos niyang igsoon. Siya nagpakita sa tinuod nga batasan sa usa ka disipulo. Naminaw siya ug misunod gayud sa tingog sa iyang Amahan nga maoy nagplano sa tanan. Busa, ang pagkamasinugtanon sa Dios mao unta ang magpatigbabaw sa atong kinabuhi tungod kay nabunyagan na kita sa ngalan ni Hesus. Amen.