St. John Paul II Parish – 13th Parochial Fiesta, Nagmalampuson ug Nagmabungahon

Malampuson ug mabungahon ang pagsaulog sa ika-13 nga parochial fiesta sa parokya ni San Juan Pablo II sa Los Amigos, Davao City kaniadtong Oktubre 22.

Gisugdan ang selebrasyon pinaagi sa unang misa sa alas-6 sa buntag nga gipanguluhan ni Fr. Russell A. Bantiles, kura paroko, kauban si Fr. Soren Abellanosa, Parish Vicar nga gisalmutan sa gidaghanon sa mga miyembro sa parokya.

Ang highlight sa maong adlaw mao ang Pontifical Mass sa alas-9 sa buntag nga gipasiugdan ni Arsobispo Romulo G. Valles, D.D., Arsobispo sa Davao, nga giubanan nila Fr. Russell A. Bantiles, Fr. Soren Abellanosa ug ubang pang mga kaparian nga midawat sa imbitasyon ug nakighiusa sa selebrasyon pinaagi sa maong misa.

Sa wala pa ang adlaw sa fiesta, gihimo ang espesyal nga Pilgrim Pope Mass sa siyam ka GKK matag alas 4:30 sa kaadlawon nga ang imahen sa santo patron nga gitawag og pilgrim pope gibiyahe aron makighimamat sa mga miyembro sa matag GKK.

Gihinumdum ug gipamalandungan usab ang siyam ka kasakit ug kalipay ni San Juan Pablo II diha sa mga pag-ampo sa tanang adlaw sa novena.

Usa ka adlaw sa wala pa ang fiesta, Oktubre 21, gipahigayon ang mobile procession diin gilibot sa tibuok komunidad ang imahen ni San Juan Pablo II, youth cross, ug ang imahen ni Birhen Maria nga nagdala og dakong kalipay sa mga misugat ug misalmot sa maong prosesyon.

Human sa mga misa sa adlaw sa fiesta, nagpahigayon og mga salo-salo ang matag miyembro sa parokya ug nagpasundayag usab sa mga maanindot nga mga talento sa matag sona, ilabina kadtong midaog sa cultural night nga gipahigayon matag gabie sa novena. (Argie Lico)