Mga Santos Sa Langit, Ig-Ampo Ninyo Kami

Bag-ohay lang, nakakita ko og video sa TikTok nga nakapamalandong kanako. Usa kini ka “Get Ready With Me” para sa Halloween, diin ang usa ka influencer nagbisti og hadlok nga nawong sa madre. Para sa kadaghanan, ang Halloween usa ka panahon sa lingaw-lingaw. Apan, nakalimtan na ba nato ang mas lawom nga buot ipasabot niini? Morag napasagdan naman sa kadaghanan ang Adlaw sa mga Santos. Naa pa bay bili ang mga santos para kanato?

Ang Halloween ginasaulog kada Oktubre 31, ug naggikan kini sa “All Hallows’ Eve,” ang gabii sa wala pa ang “All Hallows’ Day” o Adlaw sa mga Santos, nga ginasaulog sa mga Katoliko kada Nobyembre 1. Karon, ang kadaghanan nagsaulog sa Halloween pinaagi sa pagsul-ob og kostyum sa mga karakter nga sama sa multo ug uban pa. Apan gamay ra ang naghunahuna sa tinuod nga kahulogan niini isip balaan nga selebrasyon.

Para nako, angay nato timan-an ang buot ipasabot sa Adlaw sa mga Santos tungod ang ilang kinabuhi dili lang istorya gikan sa kagahapon; usa kini ka tinud-anay nga inspirasyon ug giya alang kanato karon.

Ang Mga Santos Sama sa Stained Glass – Nagpakita sa Kahayag ni Kristo

Hunahunaa ang mga santos nga sama sa stained glass sa simbahan. Ang kahayag nga gikan sa adlaw nga muagi diha sa stained glass ang nagapahimo niini nga maanyag. Sama niini, ang mga santos nagpalapnag sa kahayag ni Hesus sa ilang kinabuhi, ug lahi-lahi ang ilang paagi sa pagpakita niini. Bisan pa sa ilang mga kalisod ug kahadlok, nagsalig sila sa Dios. Nahimong timaan ang ilang kinabuhi nga bisan sa lisod nga panahon, mapakita gihapon nato ang kaayo sa Dios.

Lahi-lahi ang mga istorya sa mga santos. Pananglitan si San Agustin, nga kaniadto nakabuhat og daghang kasaypanan. Apan, nagbag-o siya ug nahimong lider sa Simbahan. Diha sa iyang kinabuhi, makakat-on kita unsaon paghatag sa tinuod nga gugma sa Dios. Usa pa mao si San Francisco de Asis, nga mibiya sa iyang adunahan nga kinabuhi ug nagpuyo nga yano. Gikan kaniya, makat-on kita unsaon pagmapaubsanon.

Mga Santos: Mga Higala nga Nag-ampo Alang Kanato

Ang mga santos dili lang mga tawo gikan sa kagahapon; mahimo usab sila nga mga higala nga mag-ampo alang kanato. Sama nga mudangop kita sa atong mga higala kung aduna kitay panginahanglan, mamahimo usab kitang muhangyo sa ilang mga pag-ampo. Para sa mga estudyante, anaa si San Jose de Cupertino, nga giila nga mutabang sa mga nagkalisod sa eksaminasyon. Kung pareho kanako nga adunay rayuma, anaa si San Alfonso Maria De Liguori nga nakaagi usab og parehas nga kasakit. Pinaagi sa pag-ampo, mahimo nato silang tawgon, ug andam sila nga motabang kanato diha sa atong panaw.

Ang Akong Paborito nga Santo: Si Maria, ang Mahal nga Birhen

Siguro tungod kay “Mama’s boy” ako, dali ra nako siya kadangpan. Sa akong pagdala sa rosaryo ug pagsul-ob sa scapular, kanunay akong mapahinumdoman sa iyang presensya sa akong kinabuhi. Gani, makahinumdom ko nga diha sa akong unang tuig sa seminaryo, pirmi nako siya hangyoon nga tabangan ug ubanan ko sa mga kalisod. Karon, hapit na napulo ka tuig ang milabay, ug naa gihapon siya sa akong kiliran, naghatag kanako og kusog samtang nag-andam ko sa pagkapari. Alang kanako, dili lang siya usa ka santo—usa siya ka inahan nga adunay tinuod nga pagmahal sa iyang mga anak.

Importante pa ba ang mga Santos?

Oo, ang mga santos importante kaayo! Naghatag sila kanato og inspirasyon aron magpuyo nga maayo ug balaan, nag-ampo sila alang kanato, ug nagauban sila kanato sa atong panaw padulong sa langit. Sama sa usa ka higala nga mutabang ug muhatag og inspirasyon, ang mga santos maghatag usab kanato og giya.

Kinsa ba ang imong paborito nga santo?

(By Jefferson M. Cua)