Magtinabangay ug Magsinabtanay

Gisaulog ang ika-44 ka tuig sa Kapistahan sa Our Lady of Fatima Gagmay’ng Kristohanong Katilingban (GKK) Royal Valley, sa Bangkal, Davao City, niadtong Oktubre trese inubanan sa tema “Santa Maria, Ang Among Inahan, Maglilig-on Sa Nagkahiusang Katilingban Diha Sa Pagka Piniyalan, Sumala Sa kinabuhi Ug Misyon Sa Simbahan.”

Oktubre kwatro, adlaw’ng Biyernes nagsugod ang nobena, nga gipangulohan sa Pangulo sa Liturhiya (PSL), Bro. Noel Legaspi. Gisunod ang Santos nga Misa pagkahuman sa nobena nga gisaulog ni Fr. Henry G. Campeon, Kura Paruko sa Our Lady of Lourdes Parish, uban sa mga GKK Servant Leaders (GSLs) ug mga miyembro sa katilingban. Kabahin sa sermon ni Padre Henry mao nga ” ang mapaubsanon maoy makadangat sa langit, apan ang dili magbuhat ug matarong, walay laing basolon ang iyang kaugalingon.”

Nianang higayona, opisyal nga gi-welcome ni Fr. Henry ug sa Katilingban ang bag-ong napiling Pangulo sa Katilingban (PSK) nga si Juliet Legaspi, tungod sa kamatayon ni kanhi PSK Rose Russell niadtong bulan sa Septembre niining tuiga, nga maoy naghupot sa katungdanan sulod sa dise-otso (18) ka tuig. Nalipay kaayo si Padre sa iyang nakita nga daghan ang hingtambong sa unang nobena ug misa.

Sa dose sa Oktubre sa alas kwatro sa hapon, nagrosaryo sa gipahigayon nga prosesyon sa bisperas sa kapistahan, ug hingsunod ang ika-siyam nga nobena ug misa. Alas siete sa buntag sa Oktubre 13 sulod sa Santos nga Misa sa kapistahan, gipahigayon ang pagpadala sa mga bag-ong napiling GSLs nga sila si Juliet Legaspi, pagka-PSK, Flora Israel, isip miyembro sa SoCCom, Cherry Mae Giducos, pagka-PSA, Cherrylyn Giducos, GKK Finance Committee. Human sa ilang pagpanumpa, gisunod dayon ang bunyag diin adunay tulo ka mga bata nga nabunyagan. Malipayon kaayo si Fr. Henry nga nagkahiusa ang Homeowners ug ang GKK.

Pagkahuman sa Santos nga Misa, adunay lamisa nga puno sa mga nagkalain-laing lamiang pagkaon gikan sa mga Pundok Banay nga gisalosalohan. Matod pa ni PSK Juliet Legaspi sa among pagpakig-istorya kaniya,”ang mga GSLs ug mga miyembro nga nagpaluyo sa akoa maoy nakapadasig nga akong gidawat ang katungdanan, nga bisan paman nga kini ang unang Apostolado nga akong gigunitan.” Ang iyang mensahe sa tanang GSLs ug miyembro mao ang “MAGTINABANGAY ug MAGSINABTANAY.”

Gikan sa pagtukod sa katilingban tuig 1976, hangtod 2024, aduna nay siyam (9) ka PSK ang milabay. Kinasing-kasing nga mga pasalamat ug mga pag-ampo sa mga kanhing GSLs nga ninghalin na ning kalibutan. May they find rest in the arms of our Creator. Sa pangama ni Birhen Maria, ang Our Lady of Fatima, uban sa pagdasig sa Espiritu Santo, nagpadayon ang serbisyo spiritual bisan paman sa nasinating mga hagit ug pagsulay.

Birhen Maria, i-ampo mo kami!

(By Graciela Pancho & Yolanda Villadores, OLLP SoCCom)