Kapistahan uban ni Santa Maria

Ang Gagmay’ng Kristohanong Katilingban (GKK) sa Birhen sa Fatima, Emily Homes, Cabantian nga nahisakop sa St. Mary of the Perpetual Rosary Parish, Buhangin, nagsaulog sa ika-26 ka tuig nga kapistahan niadtong Oktubre 19, 2024 diin gipahigayon ang Santos nga Misa sa alas otso sa buntag nga gipangulohan sa Kura Paroko, Rev. Fr. Dioniosio Tabiliran. Adunay Tema nga nagkanayon: “BIRHEN SA FATIMA, GIYA SA MAPADAYONONG PAGLAWIG, ISIP PINIYALAN UG ALAGAD NGA MAGTUTUO DIHA NI KRISTO.”

Nagsugod ang novena nga adunay Misa niadtong Oktubre 10, 2024 sa alas sais sa gabie, nga gipangulohan ni Fr. Diony. Sa misunod nga mga adlaw sa panahon sa novena, nagpaambit ang mga Pangulo sa Liturhiya (PSL) sa mga pagtulun-an sa Simbahan diin nakadugang sa kaalam sa mga miyembro isip mga Kristyano Katoliko.
Panahon sa bisperas sa kapistahan gipahigayon ang pagprosesyon sa Imahe sa Mahal nga BIRHEN SA FATIMA sa kinatibok-ang palibot sa Emily Homes diin daghan ang miuban sa maong prosesyon. Atol niining pagsaulog sa ika-26 ka tuig nga kapistahan sa Mahal nga Patron Birhen sa Fatima gibendisyonan usab ni Fr. Diony ang extension sa maong kapilya.

Gipaambit ni Fr. Diony nga unta mahisama ang atong pagtuo ug pagtahud sa gisulti ni Santa Isabel ngadto kang Santa Maria nga nag-ingon: “Bulahan ka sa mga Babayeng tanan” mao nga gitahud nato si Santa Maria nga Inahan ni Hesus ug Inahan natong tanan. Ug siya mao ang giya sa atong paglawig padulong didto sa walay katapusang kalipay sa iyang gingharian sa langit kauban nato si Maria sa paglawig, bisan unsa kalisod ang dagan sa atong kinabuhi, siya usa ka Inahan nga nagauban kanato, nag-ampo ug nagpalig-on sa atong pagtuo aron atong mapadayon ang atong panaw ngadto kang kristo, nga mao ang dalan , kamatuoran ug kinabuhi.

Malipayon ug mapasalamaton ang mga GKK Servant Leaders (GSLs) ug mga Miyembro sa makagagahum ug sa Mahal nga Inahan Birhen Maria, among Patron BIRHEN SA FATIMA sa paggiya niya kanunay ug paghatag sa mga panginahanglan sa katilingban, ingon man sa tagsa-tagsa ka mga pamilya.

Nagmalampuson ang pagsaulog sa mga kalihukan tungod sa pagpanguna sa maabtikon ug supportive nga Pangulo sa Katilingban (PSK), Mrs. Noelita Avellana inubanan sa mga Pangulo sa Liturhiya (PSL), ubang GSLs, Tigpasayon Pundok Banay (TPB), benefactors, sponsors ug sa mga miyembro.

Pagkahuman sa maong Santos nga Misa, adunay salo-salo nga gi-ambitan sa tanan alang sa kahiusahan sa matag-usa nga mitambong.

VIVA MARIA! VIVA HESUS! DALAYGON ANG DIOS!

(By Lani Arbiol Lucero, GKK SoCCom)