Kahiusahan Sa Pagtoo

Malipayon ug madasigong gisaulog sa mga parokyano sa San Pedro Calungsod Parish ang ilang ika-duhang kapistahan human sa pag-deklara kanila isip usa na gayod ka parokya sa atong Arkidayosis niadtong Oktubre 21 sa milabay’ng tuig. Ang maong kapistahan dugay nga gipangandaman sa nagkalain-laing mga Pangulo ug Ministriya sa parokya aron mamahimo kining talagsaon ug maanindot. Ang tema sa maong kapistahan mao ang Pista sa Nayon diin ang tanang parokyano gi-awhag sa pagsuot og lain-laing Traditional Filipino Clothing sama sa Barong Tagalog, Kamisa de Chino, Baro’t Saya, Kimona, ug Filipiniana ug maabtikon kining gisunod sa mga parokyano.

Ang Santos nga Misa gipangulohan sa atong halangdong Arsobispo sa Dabaw – Most. Rev. Romulo G. Valles, D.D., ug madasigong gitambungan sa mga parokyano ug mga bisita nga gikan pa sa laing lugar suot ang ilang Traditional Filipino Clothing. Pagkahuman sa Santos nga Misa, adunay paniudto nga gi-andam alang sa tanang katawhan.

Samtang nangaon ang tanan, adunay daghang mga aktibidades nga gi-andam alang sa maong selebrasyon nga gipangunahan sa Parish Youth Apostolate. Una, adunay gipahigayon nga Parangal ng Karangalan alang sa mga Pangulo nga mi-abot na og kwarenta ka tuig ang pagpangalagad diha sa Simbahan, sila ang mga buhing timailhan nga nagalawig gayud ang atong Simbahan. Ika-duha, aduna usab gipahigayon nga Saint Look-alike Contest, kung diin ang matag sona nagpili og usa ka batan-ong lalaki nga mamahimong representante nga musundog kang San Pedro Calungsod, ug kung si kinsa ang pinaka-maayo nga makasundog mao ang mananaog. Ug ika-tulo, aduna usab Booth Display Contest gawas sa Simbahan kung asa gi-showcase sa matag sona ug ministriya ang ilang nagkadaiyang mga produkto sama sa prutas, gulay ug uban pa. Pagkahuman sa tanang programa gipahigayon ang nagkalain-laing Pinoy Parlor Games sama sa Pinoy Henyo, Tug of War, Kadang-kadang, Palo Sebo, ug ang pinakalingaw sa tanan mao ang pagdakop sa baktin.

Ang maong kainit ug gugma sa pagtoo nga gipadayag sa katawhan usa ka timailhan sa kanunay nga pagpangga ug kamaayo sa Dios alang kanatong iyang katawhan ug hinaut nga ang maong gugma sa pagtoo magpabilin nga susama lang gihapon hangtod sa musunod pang mga katuigan aron sa kanunay maangkon ang kabulahanan gikan sa kahitas-an. (Christian Rosales | Parish SoCCom)