Hagit sa Obispo sa Kapistahan ni Maria

Ang parokya sa San Antonio de Padua, Agdao, nagsaulog sa ika-61 nga kapistahan sa ilang ika-duha nga patron nga si Maria sa iyang titulo nga Virgen sang Barangay. Ilang gipahigayon ang Santos nga Misa sa adlaw’ng Dominggo, niadtong Oktubre 27, 2024, nga gipangulohan ni Most Rev. Romulo G. Valles, D.D. sa alas 3:30 sa hapon ug ni Most Rev. George B. Rimando, D.D. pagka alas singko.

Sa homiliya ni Abp. Valles, iyang gidasig ang mga parokyano nga buhion pag usab ang debosyon sa mahal na birhen dinhi sa Arkidyosis sa Davao. Matud pa niya, daghang mga kaobispohan ang nagtubo sa Virgen sang Barangay ug siya mismo nagdako sa duha ka pamaagi sa pag-alagad, una, isip usa ka altar server, ug ika-duha, usa ka batan-on nga naga kuyog sa Virgen sang Barangay dala ang standarte. Sa wala pa niya gitapos iyang pagpaambit, iyang giingon nga si Maria usa ka powerful intercessor, ug hinaot nga ang tanan manghangyo kaniya nga kuhaon ang mga buling sa ilang mga mata aron makamatngon ug makakita sila sa tinuod nga dalan nga buot niyang makita nila sa ilang kinabuhi.

Ang mga GSL nagdala usab sa ilang mga standarte sa ilang mga kapilya ug gi-bendisyonan kini sa Obispo tapos sa iyang pag-ampo human sa kalawat.

Human sa Santos nga Misa, ang mga kabatan-onan sa parokya mao ang nagpasiugda sa simple nga programa uban ang mga GSL’s. Nakigduyog usab sa selebrasyon si Padre Christopher Tejido, usa ka pari sa Diocese of Parañaque nga Assistant Head sa Commission on Liturgy and Popular Religiosity, ug Spiritual Director sa Virgen sang Barangay. Iyang gipahimangnuan ang mga GSL sa pagpadayon niining maong espesyal nga debosyon kang Maria, kay sama pa sa giingon sa Obispo nga ang Agdao mao ang magsugod sa pagbalik niiining debosyon. Ang mga parokyano nalipay usab sa iyang saad sa pagbalik aron mahisgutan ang mga programa mahitungod sa pagpalambo sa debosyon ug pagpakaylap niini.

Ang tibuok kasaulogan nagmahinungdanon tungod sa dakong suporta sa ilang kura paruko nga si Padre Amado Arroyo inubanan sa iyang kauban nga pari ug Spiritual Director sa mga batan-on nga si Padre Ranie Boy Pamplona. (Harold Jhon A. Gimeno)