Andam na ba kita?

Haduol na gayud ang atong selebrasyon alang niining atong Hubileyo sa Arkdyosis. Desiotso ka adlaw nalang una ang pagsaulog sa atong triduum alang niining ika-75 nga Anibersaryo sa pagtukod sa atong lokal nga simbahan isip Arkidyosis.

Andam na ang atong mga parokya sa ilang mga selebrasyon, pahalipay ug salu-salo alang sa Nobyembre 28. Pipila kanila ang dunay mga parochial nga awarding, gani usa na dinhi ang Parokya ni San Juan Pablo Segundo sa Los Amigos ang maghatag sa pipila ka mga GSLs ug mga nangalagad sa simbahan bisan sa wala pa matukod ang maong parokya. Ang ilang kasaulogan didto sa Mergrande Ocean Resort sa Talomo. Atong atangan ang mga detalye sa mga katikaran pinaagi sa atong radyo, uban sa atong mga Official Facebook Pages nga DXGN 89.9 Spirit FM-Davao ug Davao Catholic Herald Official.

Sa tala sa atong Pastoral Office niadtong Nobyembre 5, aduna nay 2,894 ka mga partisipante ang naka rehistro sa pagtambong alang sa atong Thanksgiving Dinner. Makisayod kita sa atong mga tagsa-tagsa ka parokya ug buot kitang mutambong sa atong Thanksgiving Dinner karong Nobyembre 29. Atong masaksihan ang mga maanindot nga pasundayag gikan sa mga ngkalain-laing grupo ug skwelahan sa atong arkidyosis sama sa University of Mindanao Chorale, Holy Cross of Davao College, Inc., St. Gregory Choir, Ateneo de Davao University, University of the Immaculate Conception, St. Francis College Seminary ug Regional Major Seminary of Mindanao.

Atong saulogon ang atong Hubileyo nga puno sa kahinam, pagpasalamat ug kalipay!