PAROKYA, setenta y sais na…

Puno sa kamaya ug kalipay ang katawhan ug nagsadya sa pagsaulog sa ika-76 nga kapistahan sa Mahal nga Patron, Birhen sa Sto. Rosaryo sa Toril. Gisaulog niadtong ika-pito sa Oktobre uban sa tema: “Maalagaron ug Hiniusang Katilingban uban sa pangaliya ni Birhen Maria alang sa kalamboan sa tibuok simbahan.”

Ang nobena nga gihimo matag hapon gisugdan adtong petsa 28 sa Septembre. Ang maong nobena magsugod sa pag-ampo sa Santos nga Rosaryo. Misunod dayon ang Santos nga Misa nga pinangulohan sa nagkalahi-lahi nga mga kaparian sulod sa arkidyosis. Human sa misa adunay pagpasundayag sa mga GSLs ug mga miyembro sa nagkalain-laing mandated organizations ug mga Tigpasayon sa Pundok Banay sa likod sa simbahan. Adunay mga contest nga gipahitabo sama sa Ethnic dance, Zumba for adults ug Ball room dancing. Me partisipar usab ang eskwelahan ug ang barangay diha sa ilang pagpadala sa ilang ma partisepante. Bisan sa kakusog sa ulan malipayon gihapon sila sa pagpaambit sa ilang talento diha sa pagsayaw. Makita ang dakong kalipay sa mga parokyano nga mitambong.

Duna usab mga parlor games nga gipangulohan sa mga maabtikong miyembro sa Parish Youth Apostolate uban sa mga Pangulo sa Batan-on. Misalmot ang mga miyembro sa GKK, mga bata man o mga edaran miduyog sa maong mga padula.

Panahon sa Gabi ng Pasasalamat, nagsuot sa ilang Filiniana dress ug barong Tagalog ang mga parokyano. Naghatag og awards o certificates sa kinadugayan nga GKK nga natukod ug gidawat kini sa Pangulo sa maong GKK… Ang GKK Sagrada Corazon de Maria nga makita sa Andaya St., Daliao, mao nag kinadugayan nga natukod tuig 1911 ug karon 113 years na.

Napahigayon ug Sakramento sa Kompirma Oktobre 3 sa tibuok adlaw diin adunay kapin libo ang midawat sa maong sakramento nga gihatag sa atong Mahal nga Arsobispo sa Davao, Most Rev. Romulo G. Valles, DD. Mga maabtikong katekista ang naghatag sa pre-catechesis sa mga bata ug hamtong nga kompirmahan nga gipangulohan ni Sis Mildred Sasam, Parish Head Cathechist uban sa mga maabtikong mga katekista sa eskwelahan.

Sa adlaw sa kapistahan, adunay food packs nga gipang apud-apod sa namistahay. Aron dugang kasadya, nagpakita sa katakus sa dihang ang mga GSL star players nakigdula sa mga kaparian sa Arkidyosis sa Davao. Dinhi napakita ang ilang kadasig sa pagdula sa maong sports, ang Basketball.

Dako ang pasalamat kay Fr. Gilay kay siya mao ang nagsuporta sa tanan nga papremyo sa tanan nga padula ug sa mga pa raffle.

VIVA SANTA MARIA, VIVA JESUS. HAPPY FIESTA SA TANAN!

(By Vita Silagan)