Panalipod sa mga Arkanghel: Usa ka Pagsaulog sa ika-86 Patronal Fiesta sa GKK San Miguel

“Sa tanang panahon, Ginoo, ikaw ang among dalangpanan,” kini ang mensahe sa Salmo nga naghatag ug paglaum ug kasiguraduhan sa mga deboto nga nagkatapok aron sa pagsaulog sa ika-86 nga Patronal Fiesta sa GKK San Miguel. Sa pagsaulog sa panalipod sa mga anghel, labi na sa mga arkanghel, ang mga deboto nag-ampo alang sa proteksyon ug giya sa mga anghel nga magbalantay.

Sumala pa ni Rev. Fr. Victor Isidoro Gilay nga maoy kura sa Sto. Rosario diin nasakop ang maong GKK, kahinumdoman sa kasulatan ang pag-atake sa uban nga mga anghel sa Dios tungod sa kasina nga ilang gibati sa mga tawo. “Nagpadayon gihapon ang ilang pagrebelde diri sa atong kalibutan karon, uban sa mga kaubanan niya nga sa ato pa mga demonyo,” dugang ni Fr. Gilay. Ang mga dautang espiritu nagtinguha sa pagtintal sa mga tawo aron mupalayo sa Ginoo ug musupak sa Iyang mga sugo.

Sa pamalandong ni Fr. Gilay, kinahanglan nga mahimo kitang sama ni San Miguel. Dili kita makalimot sa pagpakig-away sa mga dautan nga espiritu sa atong palibot. Dili kita kinahanglan lamang nga mag-ampo apan kinahanglan usab kita nga mulikay sa daotan ug makig-away batok sa mga pagsulay nga nag-atubang kanato. Isip mga deboto ni San Miguel, atong buhaton ang tanan aron mahimong sama kaniya, nga magpakita sa atong pagsalig ug pagkamatinud-anon alang sa Dios. Makig-away kita alang kaniya ug ipakita ang atong pagtuo sa mga panahon nga ang kalibutan nagkinahanglan sa atong mga buhat.

Ang pagsaulog sa Patronal Fiesta sa GKK San Miguel dili lamang usa ka tradisyon, apan usa ka tawag sa matag deboto nga magpadayon sa pagpakig-away alang sa pagkamatarong ug pagtuo. Uban sa atong mga panalangin, atong ihatag ang atong kaugalingon sa Ginoo ug magpabilin nga lig-on sa atong pagtuo. Daghang Salamat sa atong Mission Partners: Estrella Yazima & Glenna Shallard.