Kaya Ra Kaayo Basta Naay Pagtuo

Makahuloganon nga gisaulog sa katilingban sa GKK Sto. Rosario-Balinsuag ang ikatulo nga kapistahan sa ilang kapilya niadtong Oktubre 5, 2024, adlaw nga Sabado.

Alas otso nga takna sa kabuntagon gisugdan ang Santos nga Misa nga gisaulog ni Rev. Fr. Cirilo Bermudez, Parish Administrator sa San Roque.

“Kaya ra kaayo ang tanan basta lang gyud naa tay pagtuo sa Ginoo,” pagpaambit ni Fr. Cirilo kinsa midayeg sa paningkamot sa katilingban nga nagpakita sa ilang gugma pinaagi sa ilang kanunay nga pag-adto sa kapilya taliwala sa mga kalisdanan.

Ang nakanindot sa pagtuong Katoliko kay aduna tay daghan nga katabang sa pagpanaw, usa na niana ang atong Inahan nga si Maria, ang Rayna Santos nga Rosaryo.

Ang pag-ampo sa Santos nga Rosaryo adunay dakong tabang sa atong pagpanaw sa kinabuhi. Kay sa matag pag-ampo nato niini, midangop man kita kang Maria, ang Inahan ni Jesus. Og ang Anak dili gayud makabalibad sa hangyo sa Inahan.

Gipahinumduman usab ni Fr. Bermudez ang katilingban nga usa sa hinungdan sa tiunay nga kalipay mao ang pagtuo nga bisan unsay mahitabo dili gyud ta pasagdan sa Ginoo.

Sa laing bahin, mapasalamaton ang katilingban nga gipangulohan ni Bro. Julito Crodua-PSK sa tanang nakigduyog sa maong selebrasyon.

Human sa Santos nga Misa gibunyagan ang duha ka mga bata nga sila Jay og Justine Caballes, anak ni Mr. & Mrs. Joey Caballes. Dayon gi sunod ang pagsalo-salo sa katilingban uban ni Fr. Cirilo Bermudez, og mga bisita.

Taliwala sa mga kalisdanan, padayon nga milayag ang katilingban tungod kay ang tanan kaya raman kaayo kung adunay pagtuo sa Ginoo.

Sa kanunay, dalaygon ang Diyos. (Jozeil Crodua)