IPA Diocesan Forum | “IPAbati, IPAlig-on: Strengthing Indigenous Peoples’ Apostolate”

Ang Diosis sa Mati nagpahigayon og duha ka adlaw nga IPA Diocesan Forum nga adunay temang, “IPAbati, IPAlig-on: Strengthening Indigenous Peoples’ Apostolate”. Kini gipahigayon sa San Nicolas De Tolentino Cathedral diin giduyogan sa nagkadaiyang IPA Parish Coordinators, pipila ka pari, ug mga layko.

Tumong sa maong panagtigom ang paghisgot sa mga programa ug plano sa IPA sa Diosis sa Mati. Sa unang adlaw, mipaambit og mensahe ang resource speaker nga si Fr. Ambrosio “Bross” Flores, SJ. Siya naghisgot kalabot sa kultura ug importansya sa “dialogue” kon “dayalogo” diha sa usa ka tribu. Matud pa niya, ang pakigdayalogo sa usag-usa makahatag gayud og kalinawan ilabina nga lahi lahi ang panglantaw sa usa ka butang kon usa ka tribu.

Nagpaambit usab sa iyang mensahe ang Halangdong Obispo Abel C. Apigo, D.D., kalabot sa direction setting, unsay padulngan ug himoon sa IPA sa Diocese sa Mati diha pagkig-uban sa mga IPs o “journeying with the IPs”.

Human niini, nagkadaiyang kalihokan ang gipahigayon diin ang mga partisipante mipresenta sa ilang plano ug programa alang sa mga IPs sa ilang parokya.

Sa ikaduhang adlaw sa panagtigom, gipahigayon ang pagpino sa mga plano ug programa nga angayng pagabuhaton. Pipila usab ang mipadayag sa ilang mga opinyon ug obserbasyon atol sa duha ka adlaw nga panagtigom. Mipadayag usab sa iyang pagpasalamat ang IPA Director, Rev. Fr. Ruben Bentayao, sa mga tawo nga nahimong kabahin sa maong kalihokan ug ngadto usab sa mga partisipante sa ilang pakigduyog sa maong panagtigom. Siya nagalaum nga ang ilang mga natun-an pagadad-on sa ilang pagpanguli ug nga ilang mapaambit usab sa uban.

Ang duha ka adlaw nga panagtigom nahuman pinaagi sa Santos nga Misa nga gipangulohan sa Halangdong Obispo Abel Apigo, D.D., kauban ang pipila ka mga kaparian sa Diosis sa Mati. (Eva Mae Calig-onan, SNDTC – SocCom Coordinator)