Ayuhon ta ang Iyang Simbahan

Gisaulog sa GKK St. Francis of Assisi sa Cutson Biao Tugbok ang ilang ika-72 nga kapistahan niadtong Oktubre 4, adlawng Biyernes. Ang Santos nga Misa gisugdan sa ala syete sa buntag ug ang nangulo niini ang kura paroko sa San Juan Pablo Segundo nga mao si Reberendo Padre Russell Bantiles.

Dugang sa siyam ka adlaw nga mga pag-ampo kon nobena, gipahigayon sab sa katilingban ang Sakramento sa Pagpakig-uli kon kumpisal, katesismo sa mga kabataan ug kabatan-onan ug pagpanudlo sa mga miyembro sa choir.

Diha sa homiliya gipaabot ni Fr. Bantiles ang hagit nga nadawat ni San Francisco gikan sa Dios nga mao ang, “ayoha ang akong simbahan.” Sumala pa niya, dunay tulo ka paagi nga maka tabang diha sa pag-ayo sa simbahan sa Dios ug nga makapadayon sa iyang misyon. Una, mao ang pagdawat ug kaamguhan nga kining simbahan iya sa Dios, ug dili sa tawo. Niining paagiha, dili gayod kita magmakuli sa pagtubag sa mga panginahanglan sa simbahan tungod kay kita nahigugma man Kaniya ug nga kita iyang ginasahan. Pinaagi sa paghalad sa atong mga kaugalingon apil na sa mga gasa nga atong nadawat, kita magpakita sa atong gugma ngadto Kaniya.

Ika-duha mao nga kita mutoo sa iyang simbahan, “mga Katoliko karon mamili la’g unsay dawaton nga pagtulon-an sa simbahan, pagtulon-an nga muhaom sa ilang kinabuhi. Siya nagpahinumdom sa pagbarog kung unsa ang gitudlo ni Jesus.

Ang ika-tulo nga pamaagi mao ang paghinulsol ug pagpaubos sa kaugalingon atubangan sa Dios. Niining paagiha susama ni San Francisco, kita andam nga ibilin, isalikway, likayan ang mga butang ug bulohaton nga maka babag o makapahilayo kanato sa Dios.

Tapos ang Santos nga Misa, gipahigayon ang bunyag alang sa mga kabataan pinaagi ni Reberendo Padre Soren Abellanosa dayong gipanag-ambitan ang mga pagkaon nga gi-andam alang sa mga GKK Servant Leaders ug mga bisita sa GKK.