Ang Matood nga Kahalangdon

Ika-29 nga Domingo sa Ordinaryong Panahon (Oct 20, 2024)
Is 53:10-11 / Ps 33:4-5, 18-19, 20-22 / Heb 4:14-16 / Mk 10:35-45

Sa diha nga ang usa ka Kristiyano magsugod sa pagpangita sa kalibutanong gahum, siya magsugod sa pagkawala sa iyang panan-aw sa mga butang langitnon. Kay ang matuod nga gahom mosidlak sa atubangan sa mga mapaubsanon nga nagsubay sa mga paagi ni Jesus dili sa mga bantugan nga ginakahadlokan ug ginadayeg sa kadaghanan.

Sa dihang ang usa mosulay sa pagtan-aw sa sekular nga kalibotan, ang “gahom” kasagarang makita ingong usa ka butang nga peligroso o makahulga pa gani. Sama nga ang gahum nagpadayag sa kapasidad sa tawo sa pagmugna ug pagtukod, mahimo usab nga ipadayag ang iyang kapasidad sa pagguba ug pagbungkag sa bisan unsang butang labi na kung nagsugod na siya sa pag-abuso sa iyang gahum ug pagbag-o sa tanan sumala sa iyang kagustuhan ug kapritso. Sa kasaysayan, mahimo natong hinumduman ang pipila ka mahinungdanong mga tawo kansang mga ngalan nahibal-an nga malupigon nga nakaangol ug nakalapas sa tawhanong katungod pinaagi sa paggamit sa ilang gahum nga sila Nero, Hitler, Stalin, ug Mao Zedong. Ug sa gihapon karon, daghan ang nagtinguha sa pagpausbaw sa kaugalingon nga kasagarang halayo sa tiunay nga kahalangdon nga mao ang dili hinakog nga paghatag sa kaugalingon sa pagserbisyo.

Diha sa ebanghelyo, ang Dios nagpresentar kanato sa usa sa labing makahuluganon nga pagsumpaki sa mga pagtulon-an sa atong Ginoo – ilabi na ang ideya sa pagsumpay sa pagkahalangdon ngadto sa pagka-alagad. Unsa man ang matood nga kahalangdon? Ang Dios nag-ingon: “Bisan kinsa nga buot mahimong bantugan kaninyo mahimong sulugoon sa tanan.”

Sa diha nga ang kalibutan nagrepresentar sa usa ka larawan sa kahalangdon gikan sa hataas nga punto sa kabantog, kadato, ug kahayag, ang Ginoo nagpakita sa iyang kaugalingon ngari kanato ingon nga sumbanan sa kahalangdon – usa ka sulugoon nga lider nga mihalad sa iyang kinabuhi alang sa kadaghanan. Hinaut nga matandog kita sa imbitasyon nga isip mga sumusunod sa atong Ginoong Jesu-Kristo, kinahanglan usab nga atong ipunting ang atong panglantaw sa mga nanginahanglan ug sa pag-alagad kanila dili alang sa kinaugalingon nga katagbawan kondili alang sa gugma, alang sa ikaayo sa katawhan, ug alang sa kahimayaan sa Iyang ngalan. (Sem. Perry Neil Patayon and Sem. Resty Cabahug)