Ako Mismo Mao ang Tulay

Duolan sa dos siyentos ka mga delegado sa mga nagkalain-laing relihiyon o pagtuo gikan sa komunidad sa mga Muslim, nagkalain-laing tribo sa mga lumad o indigenous people, mga mainline protestants, Romano Katoliko ug mga relihiyosong eskwelahan ug kongegrasyon sa Syudad sa Dabaw ang mitubag sa imbitasyon sa gipahigayon nga Missio Ad Gentes: Indigenous Peoples Apostolate (IPA) and Archdiocesan Center for Ecumenical and Interreligious Dialogue (ACEID) Apostolate, niadtong Sabado, ika-12 sa Oktubre 2024 sa Our Lady of Lourdes Parish, Bangkal, Davao City. Ang maong panghitabo mao ang ika-walong bahin sa siyam ka bulang pagpangandam alang sa pagselebrar sa Diamond Jubilee sa Archdiocese sa Davao.

Kabahin sa programa mao ang interreligious prayer nga gipangunahan nila ni Rev. Roderick R. Raut sa UCCP-Brokenshire College, Aleem Omar A. Abdullah sa Muslim community, Jonathan Awing nga representante sa mga lumad, ug si Fr. Pete Lamata alang sa Roman Catholic Church. Adunay tulo ka mga mamumulong nga sila Fr. Pierre Samson, PME alang sa IP ug mga Katoliko, Rev. Dr. Romeo P. Estabillo, Jr., Pastor sa United Church of Christ in the Philippines o UCCP, ug si Ustadz Taha Ainin alang sa mga Muslim, uban sa ilang nagkadaiyang mga Reactors nga sila Fr. Florencio Acedo, Jr. IPA Director, Sister Carmelita Padernal, UCCP member, og si Fr. Pete Lamata, Director sa ACEID Apostolate sa Archdiocese of Davao.

Pinasahi ang pagbahin-bahin sa mga delegado sa matag lamesa kay gilangkuban kini sa napulo ka nagkalain-laing mga delegado gikan sa lumad, muslim, protestante, katoliko ug mga religious schools ug congregation nga adunay naka-assign nga facilitator atul sa ilang small group sharing. Nalingaw usab ang mga delegado sa pasundayag sa mga igsoong lumad gikan sa tribo sa Bagobo Clata sa ilang talento sa pagsayaw, pagtugtog ug pag-awit.

Si Msgr. Julius Rodulfa, Vicar General sa Archdiocese of Davao, naghatag usab sa iyang Words of Welcome and Inspiration ngadto sa mga partisipante sa ngalan sa atong halangdong Arsobispo sa Dabaw, Most Rev. Romulo G. Valles, D.D., ug nagkanayon sa pagka-colorful sa palibot dili lang tungod sa nagkalain-laing mga kolor sa dekorasyon, apan mas nahimo kining colorful tungod sa nagkalain-laing mga grupo sa katilingban nga nagkahiusa. Sa katapusan, siya nanghinaut nga colorful usab ang journey o panaw sa matag usa ngadto sa usa ka Diyos.

Matud pa ni Fr. Pepe Retorca, Mission Director sa Archdiocese sa Davao, isip pasalamat og malipayong kasaulogan sa ika-75 anniversary sa katukuran sa dayosis nga nagtubo sa iyang pagka-archdiocese, nagpabalik-lantaw ang simbahan sa pastoral nga kasaysayan sa misyon niini, dili lang sa mga Katoliko, apan ngadto usab sa mga nagkalain-laing pagtuo, tribo, kultura og komunidad, nga susama sa simbahan nagapanaw usab sa ilang pagtuo, kultura ug kinabuhi, nga mao ang kahiusang panaw sa katawhan diha sa pagpalambo sa kinabuhi og pagpuyo sa kalinaw ug pagtuo.

Dugang pa niya, ang apostolado sa ACEID nga kaniadto gipanguluhan ni kanhing Fr. Paul Cunanan ug karon ni Fr. Pete Lamata, nagsugod kaniadto pang 1970’s ug gipahikusgan sa panahon ni kanhing Archbishop Emeritus Fernando Capalla. Apan sa dagan sa panahon, gilahi ang apostolado sa Indigenous People aron matutukan sa simbahan ang pagpangalagad ngadto sa mga kaigsuonang lumad sa pagpalambo sa ilang kinabuhi, kultura ug pagtuo. Mao usab kini ang hinungdan nga ang bulan sa Oktobre mao ang bulan sa misyon, ug ang pagtagana sa pagpahigayon sa Missio Ad Gentes o the Church in Today’s World gathering.

Gipasabot usab ni Fr. Retorca nga ang rationale sa maong panagtigom mao ang: 1) pagpadayag sa dako nga pasalamat sa Archdiocese sa Davao sa suporta, kooperasyon, pagpakigduyog sa mga kaigsuonan sa IP community, Muslim community, ug sa nagkalain-laing pagtuo sa simbahan ug sa mga aktibong laykong lumilihok sa Archdiocese sa Davao sa “Pagpanag-uban sa Panaw sa Dayalogo o Pakighinabi diha sa Misyon” o “Journeying Together in Mission” nga mao ang tema sa pagpanagtigom, ug 2) pag-inambitay og pagpaminaway sa tagsa-tagsang kasinatian diha sa nagkalain-laing buhat sa misyon ngadto sa mga kaigsuonan.

Si Fr. Pierre Samson, PME, sa iyang pagpaambit diha sa iyang kasinatian sa singkwenta ka tuig isip usa ka missionary sa IP community nagkanayon nga dili sayon ang maong misyon o apostolado. Kini nanginahanglan og preparasyon sa dakong pagtoo ug pagsalig sa Diyos. Nahimo niya ang maong misyon tungod usab sa iyang panghuna-huna nga “we are in one roof, in one place” nga maoy nakapaamgo kaniya nga “kitang tanan konektado sa usag-usa”. Mao kini iyang gihimo nga sumbanan aron magpadayon siya sa iyang misyon inubanan sa pasensya, pagpaubos, paggahin ug oras, paglahutay hangtud nga ang full mutual trust o bug-os nga pagsalig sa usag-usa nakab-ot. Dugang pa niya, kung gusto nato mag-uban sa pagpanaw, sugdan kini sa usa ka dayalogo o panaghisgot sa kinabuhi, unya mag-uban sa pagplano og pag-organisa. Sa katapusan, siya miingon “Let’s become witnesses how dialogue put our lives together”. Si Fr. Jhun Acedo nagpadayag usab, isip reaksyon sa pagpaambit ni Fr. Samson nga sa usa ka misyon gikinahanglan ang “total immersion” ug “faith encounter” padulong sa empowerment sa usa ka tawo, nga mao usab iyang nasinati.

Ang mamumulong gikan sa UCCP nga si Rev. Dr. Romeo P. Estabillo, Jr. nagpaambit nga ang ilang misyon mao ang “Evangelism and Proclamation of the Gospel” alang sa personal conversion og transformation. Apil usab sa ilang misyon mao ang “social justice” o katilingbanong hustisya ilabi na sa mga kabus og dinaugdaog, ug ang nagkalaing-laing “advocacy” sa edukasyon, panglawas, kabuhatan, ecumenism o interfaith dialogue. Siya usab nagkanayon nga dako ang importansya sa dayalogo padulong sa kalinaw ug kahiusahan. Siya misugyot nga imbes na maghimo ug tulay mas maayo nga AKO MISMO ANG TULAY aron ipalambo ang kalinaw ug panag-uyon sa misyon sa usa ka pluralistic community sama sa Pilipinas. Sa reaksyon ni Sister Carmelita Padernal, siya nagkanayon nga nagkalahi-lahi man ang doktrina sa simbahan, adunay usa ka misyon sa kinabuhi ang tao nga mao ang pagserbisyo sa Ginoo nga nagpasabot usab sa pagpanerbisyo sa tao ug sa kinaiyahan. Kinahanglang nakasabot kita nga si Hesukristo nagpakamatay sa krus tungod ug alang sa tawo, ug ang misyon mao ang paghimaya sa Diyos. Iyahang gihimong ehemplo ang usa ka kahoy nga gitandi sa usa ka tao. Matud niya, ang kahoy adunay mga gamut nga mosupsop og mga nutrients sa yuta nga mao ang hinungdan nga mamunga kini depende sa nutrients nga iyang nakaon sa ilalom sa yuta. Susama sa usa ka tao nga adunay maayong gamut ug pagkaon, mamunga kini ug kaayuhan. Gikinahanglan ang collaborative effort sa pagpaminaw aron masabtan unsa ang tumong sa atong kinabuhi, ug ang pagdayalogo aron magkasinabot.

Ang ikatulong mamumulong gikan sa Muslim community nga si Ustadz Taha Ainin, nagpaambit nga kita “mga dakilang biyaya mula sa dakilang Diyos na tagapaglikha”. Matud pa niya ang Islam mao ang “relihiyon ng ugnayan” tungod kay “ang ating pinanggalingan ay iisa lamang, sina Adan at Eba, tayo ay magkamag-anak kaya kailangan ang paggalang at pangalagaan ang karapatan ng isa’t-isa”. Dugang pa niya, “Ipalaganap ang kapayapaan at kapatiran”. Nanawagan si Fr. Pete nga ang lihok sa kalinaw sa dakbayan og sa Mindanao ipadayon pinaagi sa kahiusahan ug pagsinabtanay. Sa katapusan, siya miingon nga “There is no development without peace.”

Human nga nadungog ang mga pagpaambit sa mga mamumulong og mga reactors, adunay group sharing ang matag lamesa aron ilang tubagon ang mga pangutanga base sa gipa-ambit sa mga resource speakers, uban ang ilang mga facilitators. Apan ang pinaka-importante mao ang concrete action sa grupo nga ilang gisulat sa papel ug ilang gibitay sa usa ka punuan nga simbolo sa hulagway sa usa ka Diyos apan nagkalain-lain nga katawhan ang simbahan.

Sa pagtapos sa maong forum, nagkanayon ang tanan nga ipadayon ang dayalogo aron makab-ot ang pagsinabtanay, pagrespetuhay, kahiusahan ug kalinaw sa nagkalain-laing panginabuhi, kultura og pagtoo sa nagkadaiyang tribo o komunidad aron sa usa ka nagsinudong simbahan. Gitapos ni Fr. Retorca ang synthesis sa pag-ingon nga AKO MISMO MAO ANG TULAY sa pagpanag-uban sa panaw sa dayalogo o pakighinabi diha sa misyon. Gitapos ang panagtigom sa usa ka awit nga “Let there be peace on earth” misunod ang paniudto o agape. (Rowena Baldoza Villaflor, OLLP SoCCom)